Qatysýshylar ulttyq qundylyqtardyń qoǵamdaǵy orny men mańyzyn, jahandaný dáýirinde ulttyq bolmys pen dástúrdi saqtaýdyń joldaryn, el damýyna yqpal etetin rýhanı-mádenı qundylyqtardy nyǵaıtýdyń mańyzyn talqylady.
Debattyń alǵashqy bóliminde ár toptyń úsh múshesi jeke-jeke sóz sóılep, óz ustanymdaryn 4 mınýt ishinde dáleldeýge tyrysty. Munda spıkerler taqyrypty jan-jaqty taldap, ózderiniń jaqtaýshy jáne dattaýshy kózqarasyn naqty dáıektermen jetkizdi. Odan keıingi kezeńde taraptar bir-birine ótkir saýal qoıyp, qarsylas pikiriniń álsiz tusyn ashýǵa, dáleldi túrde teristeýge umtyldy.
Qorytyndy bólimde top jetekshilerine sóz berilip, olar óz komandalarynyń ustanymyna sáıkes túıindi oılaryn aıtty. Bul kezeń pikirsaıystyń mazmunyn jınaqtap, tyńdaýshylarǵa salmaqty oı qaldyrýǵa baǵyttaldy.
Osylaısha pikirsaıys memlekettik qyzmetkerler arasynda tájirıbe almasý, tyń ıdeıalar men jańa kózqarastardyń qalyptasýyna yqpal etken alańǵa aınaldy. Debatty uıymdastyrýǵa «Amanat» partııasy Astana qalalyq «Birlik» aýmaqtyq fılıaly men «Debat Eli» qoǵamdyq qory atsalysty.
«Partııanyń maqsaty Úkimetke qaraıtyn eki mınıstrlikti jarystyrý emes. Biz Ádiletti Qazaqstanǵa qadam basý úshin osyndaı minberlerde halyqtyń pikirin aıtýymyz kerek. Pikirsaıys barysynda qatysýshylardyń taqyryptar boıynsha daıyndyǵy, biraýyzdylyǵy jáne óz pozısııasyn qorǵap bilýi eskerildi», deıdi qazylar alqasynyń tóraǵasy Ábdiǵanı Bázilhanuly.
Debat qorytyndysynda ekinshi oryndy Kólik mınıstrliginiń qyzmetkerleri ıelense, bas júldeni О́nerkásip jáne qurylys mınıstrligi qanjyǵalady. Barlyq qatysýshylarǵa arnaıy dıplomdar men demeýshiler atynan qarjylaı sertıfıkattar tabystaldy.
Jalpy mundaı is-sharalar memlekettik qyzmetshilerdiń mártebesin kóterýdi, synı oılaýdy, sheshendik ónerin shyńdaýdy kózdeıdi. Sondaı-aq memlekettik basqarýdaǵy jastardyń kóshbasshylyq qabiletin jetildirýdi maqsat etedi.
