Sharaǵa zııaly qaýym ókilderi men kitapsúıer oqyrman qatysty. Alǵashqy bolyp sóz alǵan akademık Serik Negımov aqyn týraly:
«Bul kisi «Egemen Qazaqstan» gazetine bir maqalam shyqsa, ala tańmen talasa qońyraý soǵyp, aqjarma nıetin bildiretin. Mirjaqyp Dýlatuly bir kezde «Oıan, qazaq!» dep uran tastaǵan edi. О́tken ǵasyrdyń bel ortasyndaǵy býyn ulttyq sanasy jańǵyryp, oıana bastady. Sol erte oıanǵandardyń biri – Aıypbergen Baltabaev. Qurylysshy, aýdandyq máslıhat depýtaty syndy jumystar atqara júrip shyǵarmashylyqpen aınalysty. Búgingi zamanda kitap oqý, jýrnal oqý jaǵy turalap qaldy. Al bizdiń Aıekeń sonaý Jetisaıda jatyp úlken poezııalyq eńbekter jazyp, aýdarmalar jasady. Al Omar Haıamdy aýdarýy – bólek taqyryp. Qýandyq Shańǵytbaevtan keıin mundaı táýekelge barýdyń ózi erlik der edim. О́ıtkeni Omar Haıam – ár shýmaǵy tunyp turǵan fılosofııaǵa toly kúrdeli aqyn», dedi.
Aıypbergen Baltabaıuly – kóptegen jyr kitabynyń avtory, nemis oıshyly Geteniń 100-den asa óleń-jyry men «Reıneke túlki» dastanyn, sondaı-aq Pýshkın, Lermontov, Omar Haıam, qumyq qyzy Gúlbaǵdat Omarovanyń jyrlaryn tól tilimizge tárjimalaǵan. Al qazaq tilinde jaryq kórip otyrǵan «Lena ózeniniń jaǵalaýynda» romany – Reseı jazýshysy Ivan Pereverzınniń qaıta qurý aldyndaǵy ıakýt halqynyń turmys-tirshiligin jan-jaqty sýretteıtin súbeli «ensıklopedııalyq» týyndy. Romanda Marııa sulý men keńshar dırektory Anatolıı Petrovıch arasyndaǵy mahabbat hıkaıasy arqyly sol dáýirdiń bet-beınesi ashylady. Eleýli týyndy haqynda orystyń tanymal ádebıet synshysy Lev Annınskıı: «Bul roman – orys prozasynyń jadynda uzaq saqtalary daýsyz. Shyǵarma osy kúıinde qalsa da, ne jalǵasyn taýyp, kóptomdyq epopeıaǵa aınalsa da, esh artyq etpesi anyq», dep joǵary baǵa beripti.
Is-sharaǵa qatysqan belgili jyrshy, manasshy Baıanǵalı Álimjanov qalamger shyǵarmashylyǵyna toqtaldy.
«Bul kisi maıdangerdiń balasy eken. Sol jaǵynan uqsastyǵymyz bar. Ekinshiden, aǵamyz qurylysshy aqyn. Qurylysshy mamandyǵyn ıelene júrip, mynadaı irgeli eńbek jasaý úlken qumarlyqtan, ǵashyqtyqtan týǵan. Basqa mamandyqty ıgerse de, gúldiń sementti jaryp shyǵatyn qaısar qasıetindeı, aqynnyń talanty kez kelgen kedergini jaryp shyǵyp, gúldeı ósip, kórkeıip tur dep oılaımyn. Geteni alǵash Abaı atamyz aýdarsa, sol izgi dástúrdi jalǵap, siz ári qaraı damytqan ekensiz. Al qumyq aqynyn aýdarǵanyńyz úlken eńbek der edim», dedi ol.
