Bıyl Abaı jerinde egin jınaý alańy 782,1 myń gektarǵa jetti. Onyń ishinde dándi daqyldar – 296,5 myń gektar, maıly daqyldar – 339,4 myń gektar, kartop – 5,9 myń gektar, kókónis-baqsha daqyldary – 5,2 myń gektar jáne jem-shóp daqyldary – 135,1 myń gektar. Qazir astyqtyń aıtarlyqtaı bóligi jınalyp, qoımalarǵa jetkizilip jatyr.
Agrarlyq aımaqtaǵy egin naýqanynyń jaı kúıin Abaı oblysy aýyl sharýashylyǵy basqarmasy basshysynyń orynbasary Mıras Toqtarhanovtan bilgen edik. Onyń aıtýynsha, bıyl agrarly aımaqta egin jınaý qarqyny jaqsy.
– Búginge deıin dándi daqyldardyń 132,7 myń gektary oryldy, bul jalpy alqaptyń 44,7 % quraıdy. Ortasha ónimdilik – gektaryna 14 sentnerden aınalyp, 189,6 myń tonna astyq bastyryldy. Onyń ishinde bıdaıdyń 102 myń gektary jınalyp, 153,6 myń tonnadan astam ónim alyndy. Maıly daqyldardyń kúzgi naýqany endi bastaldy, ázirge 220 gektar oryldy. Odan 500 tonna ónim alyndy. Al kartoptyń 2,5 myń gektary jınalyp, 53,9 myń tonna ónim qoımalarǵa jetkizildi. Kókónis-baqsha daqyldary da nátıjesi jaqsy. 2,7 myń gektardan 66 myń tonna ónim alyndy, – dedi M.Toqtarhanov.
Onyń aıtýynsha, egin jınaý naýqanynyń úzdiksiz júrýi úshin aýyl sharýashylyǵy taýar óndirýshilerine 23 myń tonna jeńildetilgen dızel otyny qarastyrylǵan. Qazirde jóneltý kestesine sáıkes 8,5 myń tonnasy sharýalarǵa jetkizildi.
– Búginde egin jınaý jumystaryna 4 myń traktor, 2,4 myń kombaın jáne 700 oraq jumyldyrylǵan. Jınalǵan ónimdi saqtaý úshin oblysta jalpy syıymdylyǵy 206 myń tonna astyq qabyldaý kásiporyndary men dıqandarda 870,9 myń tonnaǵa arnalǵan qoımalar bar. Sonymen qatar 2025 jylǵa arnalǵan mıneraldy tyńaıtqyshtardy engizý jospary 63,6 myń gektar bolǵan, ol búginde tolyq oryndaldy. Eginshilik salasyn qarjylandyrý kólemi artty. «Keń Dala» baǵdarlamalary arqyly sharýashylyqtarǵa 9,5 mlrd teńge kóleminde jeńildetilgen nesıe berildi. Bul jumystar oblys ákimdiginiń turaqty baqylaýynda, – deıdi ol.
Abaı oblysy
