Mereıtoı Bıdaıyq aýylynda, qaıratkerdiń kesenesi mańynda qaıta jańǵyrtylǵan Mirjaqyp mýzeı-úıiniń saltanatty ashylý rásiminen bastaý alady. Odan ári merekelik baǵdarlama Torǵaı óńirinde jalǵasyp, Qostanaı qalasynyń ortalyǵynda Mirjaqyp Dýlatulyna arnalǵan jańa eskertkish boı kótermek.
Torǵaıdyń irgesinde 70-ten asa aq shańqan kıiz úı tigildi. Arqalyq qalasy 6, Qarabalyq aýdany 4, Áýlıekól aýdany 5 kıiz úı tigip, toıǵa úles qosty.
– Mirjaqyp atamyzdyń toıyna el qatarly úles qosý – paryzymyz. Memleket basshysy Qasym-Jomart Toqaev sońǵy jyldary Torǵaı aımaǵyn damytý jóninde keleli máselelerdi kóterip keledi. Prezıdent Joldaýynda bul óńirdiń áleýmettik-ekonomıkalyq damýy Úkimettiń aıryqsha nazarynda bolatynyn atap ótti. Biz toıǵa óz úlesimizdi qosý úshin bes kıiz úı tigip qoıdyq. Júzden asa qonaqty qarsy alýǵa daıynbyz. Arnaıy konserttik baǵdarlamamyz ben kórmemizdi ákeldik, – dedi Áýlıekól aýdany ákiminiń orynbasary Jumataı Kákimjanov.
Merekelik baǵdarlama aıasynda Torǵaı tórinde «Mirjaqyp Dýlatuly jáne ult rýhanııaty» atty respýblıkalyq ǵylymı-tájirıbelik konferensııa ótedi. Jıynǵa elimizdiń belgili ǵalymdary qatyspaq.
Sonymen qatar jyrshy-termeshilerdiń respýblıkalyq baıqaýy, aqyndar aıtysy, kókpar, báıge, qazaq kúresi sııaqty ulttyq sport túrlerinen respýblıkalyq jarystar uıymdastyrylady.
Ásirese, merekeniń eń qyzyqty bóligi retinde «Uly dala joryǵy» halyqaralyq marafon-báıgesi ótedi. Uzyndyǵy 500 shaqyrymdyq doda Torǵaı men Arqalyq arasynda uıymdastyrylyp, oǵan Qazaqstannyń barlyq óńirinen, sondaı-aq Reseı men Qyrǵyzstannan kelgen komandalar qatysady.
