Sýretshiniń kenebinde Almaty oblysynyń eń kórkem ári názik tabıǵı aımaqtary — Qaıyńdy men Kólsaı kólderinen bastap, Sharyn shatqaly men Ile Alataýyna deıingi tumsa tabıǵat beınelengen.
Qylqalam ıesi kórermendi tereń oıǵa tartatyn biregeı toptamasyn tabıǵı aımaqtardyń jappaı týrızm saldarynan qalaı ózgerip jatqanyn óz kózimen kórgennen keıin jaza bastaǵan. Kólsaı, Esik, Sharyn jáne Úlken Almaty kóline jasaǵan saparlary oǵan shabyt berip qana qoımaı, ekologııalyq máselelerge kórkemdik turǵydan ún qatýǵa túrtki bolypty. Sol áserlerdiń nátıjesinde jazylǵan keneptegi keskindemeler — sýretshiniń jastyq shaǵynda kórgen tabıǵat aıasyndaǵy estelikteri men jan dúnıesine tynyshtyq syılaǵan, qorǵap qalǵysy keletin erekshe mekenderge degen saǵynyshynyń kórinisi.
О́nertanýshylardyń pikirinshe, «Meniń úıim» kórmesi belgili bir maǵynada jańa kezeńniń, qaıta órleýdiń sımvoly retinde qarastyrylady. Ekspozısııadaǵy árbir týyndy — peızaj ǵana emes, tabıǵatqa qurmetpen jáne saqtyqpen, sanaly túrde qaraýǵa shaqyratyn vızýaldy úndeý. Kórmede usynylǵan birneshe keskindeme halyqaralyq deńgeıde tanylyp, Londonda ótken bedeldi Golden Talent baıqaýynda júldeli oryn alǵan.
«Kórmeniń maqsaty — óner men ekologııalyq belsendilikti biriktirip, kórermendi kórkem beıneniń kúshi arqyly tabıǵatqa qamqor bolýǵa shabyttandyrý. Meniń ónerim – meniń ómirim. Kartınalarymdaǵy jarqyn reńkter – meniń ómirge degen kózqarasymdy, kóńil-kúıimdi jetkizedi. Tabıǵatty aıalaý barshaǵa ortaq paryz»,-deıdi kórme avtory.
