«Memleket basshysy Qasym-Jomart Toqaev eńbek adamynyń el damýyna qosqan úlesin baǵalaýdyń mańyzdy ekenin únemi atap ótedi. Buǵan dálel – 2025 jyldyń Jumysshy mamandyqtar jyly bolyp jarııalanýy. Bul – kún saıynǵy eńbegimen, jaýapkershiligimen, kásibine degen súıispenshiligimen ómirimizdi jaqsartyp, elimizdi nyǵaıtyp júrgen adamdarǵa kórsetilgen qurmet», dedi Gúlbaram Ǵızatqyzy.
«Eńbek joly» baıqaýyna oblystyń 26 kásipornynan eńbek áýletteri, tálimgerler men jas mamandar qatysty. Jeńimpazdar úsh atalym boıynsha anyqtaldy.
Baıqaý qorytyndysy boıynsha Rýdnyı qalasynan Sazonovtar áýleti «Úzdik eńbek áýleti» atalymyn jeńip aldy. Sarybaı-Sokolov taý-ken óndirisi birlestiginde jumys isteıtin atalǵan áýlettiń aldyńǵy, keıingi býyn ókilderiniń jalpy eńbek ótili – 225 jyl.
«Jumysshy jastardyń úzdik tálimgeri» atalymy boıynsha Qostanaı qalasynyń turǵyny «QJEK» MKK ókili Rıshat Fashýtdınov jeńimpaz atandy. Al Jitiqara qalasynan kelgen elektrshi Asylbek Arystanbaev «О́ndiristiń úzdik jas qyzmetkeri» nomınasııasyn jeńip aldy.
«Men elektr monteri mamandyǵyn tańdadym. Jumysym janyma jaqyn. Bul mamandyq qashanda suranysqa ıe dep oılaımyn, óıtkeni elektr qýaty barlyq jerde bar. Ony úıde de, jumysta da, óndiriste de paıdalanyp otyrmyz. Sondyqtan elektr monteri – adamdardyń qaýipsizdigin qamtamasyz etetin, úlken jaýapkershilikti kerek etetin jumys», deıdi baıqaý jeńimpazy.
Bıznestiń áleýmettik jaýapkershiligin qoldaý maqsatynda uıymdastyrylǵan «Paryz» baıqaýyna 8 kásiporyn qatysty.
Baıqaý nátıjesinde Qostanaı aýdanynda jumys istep jatqan «Belozer 2030» seriktestigi «Áleýmettik jaýapkershiligi eń joǵary kásiporyn» atalymyn jeńip aldy. «Eńbekti qorǵaý salasyndaǵy úzdik kásiporyn» nomınasııasy borıynsha Jitiqara aýdanynan kelgen «Qostanaı mıneraldary» AQ jeńimpaz atandy. Sondaı-aq, Qostanaı jylý energetıkalyq kompanııasy «Úzdik ujymdyq shart» atalymyna ıe boldy. Al Rýdnyı qalasyndaǵy «Sokolov-Sarybaı taý-ken baıytý óndiristik birlestigi» AQ «Ekologııaǵa qosqan úlesi úshin» nomınasııasyn jeńip aldy.
Baıqaý jeńimpazdaryna estelik músinsheler men aqshalaı syılyqtar tabys etildi.
Qostanaı oblysy
