Ashylý saltanatyna Premer-mınıstriniń orynbasary Ermek Kósherbaev, Koreıa Respýblıkasynyń Qazaqstandaǵy Tótenshe jáne ókiletti elshisi Chjo Te Ik, Ǵylym jáne joǵary bilim mınıstri Saıasat Nurbek, Túrkistan oblysynyń ákimi Nuralhan Kósherov, sondaı-aq «Výsong bilim qorynyń» qurmetti tóraǵasy jáne basqarma múshesi Kım Son Kıong myrza qatysty.
«Prezıdent Qasym-Jomart Kemeluly Toqaevtyń tapsyrmasy boıynsha elimizde sheteldik jetekshi joǵary oqý oryndarynyń fılıaldaryn ashý jumystary júrgizilýde. Qazirgi ýaqytta túrli formatta 40 strategııalyq áriptestik júzege asyryldy, onyń 33-i – sheteldik ýnıversıtetter fılıaldary. Búgin biz tarıhı oqıǵanyń kýási bolyp otyrmyz – rýhanı baı ári kóne Túrkistan qalasynda Koreıa Respýblıkasynyń jetekshi ýnıversıtetiniń fılıaly ashyldy. Bul joǵary oqý orny jaı ǵana bilim berý alańy emes, halyqaralyq yntymaqtastyq pen ınnovasııalar ortalyǵy jáne elimizdiń zııatkerlik kapıtalyn qalyptastyratyn joǵary bilikti mamandar daıarlaıtyn ortaǵa aınalady», dedi vıse-premer Ermek Kosherbaev fılıaldyń ashylý saltanatynda.
Al Ǵylym jáne joǵary bilim mınıstri Saıasat Nurbek Qazaqstannyń Ortalyq Azııadaǵy jetekshi bilim berý habyna aınaldyrýǵa baǵyttalǵan jobalardyń mańyzdylyǵyn atap ótti. Elimizde sheteldik joǵary oqý oryndarynyń fılıaldaryn ashý osy strategııalyq maqsatqa jetýdiń mańyzdy bóligi ekenin aıtty. «Woosong University Kazakhstan» dırektory Hva Chon Ion ýnıversıtettiń mıssııasy, negizgi bilim berý baǵdarlamalary, ǵylymı baǵyttary jáne halyqaralyq seriktestik týraly keńinen baıandady.
Jalpy aýdany 16 252 sharshy metrdi quraıtyn ýnıversıtette eki bilim berý baǵdarlamasy júzege asyrylady. Stýdentter «Jasandy ıntellekt» jáne «Derekter týraly ǵylym» mamandyqtary boıynsha bilim alady. Joǵaryda atalǵan baǵdarlamalar aıasynda «Qos dıplom» jáne «Akademııalyq utqyrlyq» múmkindikteri qarastyrylǵan. «Qos dıplom» baǵdarlamasy aıasynda stýdentter 2 jyldy «Woosong University Kazakhstan» ýnıversıtetinde jáne 2 jyldy Woosong University (Koreıa) nemese Woosong University-diń álemdegi seriktes oqý ordalarynyń birinde oqı alady. Baǵdarlamany aıaqtaǵan stýdentter eki dıplomǵa ıe bolady. «Almasý baǵdarlamasy» aıasynda shetelde oqý, tájirıbeden ótý múmkindikteri bar.
Ýnıversıtette arnaıy professorlyq-oqytýshylar quramy jasaqtalǵan. Ýnıversıtettiń materıaldyq-tehnıkalyq bazasynda 600 oryndyq jataqhana, Woosong University (Koreıa) bazasyndaǵy elektrondyq kitaphana bar. Búginde Túrkistanǵa Koreıadan 100-ge jýyq stýdent arnaıy keldi. Olar aldaǵy bir aı boıy osynda bilim alyp, jergilikti jastarmen tájirıbe almasady. Al Túrkistan oblysy ákimdigi tarapynan ýnıversıtetke 100 grant bólinip, olardyń basym bóligi óńir jastaryna berildi. Bilim ordasynyń 2000 stýdentke deıin qabyldaýǵa múmkindigi bar. Bıyl ýnıversıtette bilim alýǵa Túrkistan oblysynan bólek, Astana, Almaty, Shymkent qalalarynan, sondaı-aq Qyzylorda, Jambyl jáne Qaraǵandy oblystarynan 400-ge jýyq talapker qujat tapsyrǵan.
