О́nerkásiptik-logıstıkalyq jáne iskerlik ortalyqtan bastap, ǵylymı-bilim men týrıstik klasterlerge deıin ár aýdannyń ózindik baǵyty bar.
Gate District О́tegen batyr, Pokrovka, Qoıanqus, Yntymaq jáne Jańalyq eldi mekenderiniń arasynda ornalasqan. Munda «PepsiCo», «Caspian Group», Almaty jeldetkish zaýyty sııaqty iri jobalar júzege asyrylyp jatyr. Aýdannyń basty ortalyǵy – «Iconic Building-1» halyqaralyq bıznesti damytý ortalyǵy bolmaq. Qanat Bozymbaev О́QM, oblys ákimdigi jáne ınvestorlarǵa bul ǵımarattyń qurylysyn jedeldetýdi tapsyrdy. Onyń aıtýynsha, bul nysan «Alatau City» jobasynyń resmı bastamasynyń rámizine aınalmaq.
«Golden District» Kishi Almaty jáne Qaskeleń ózenderiniń arasyndaǵy tasjol boıynda ornalasqan. Bul aımaq ǵylym, bilim jáne medısına ortalyǵy retinde damytylmaq. Munda «K-Park» mádenı-bıznes kesheni, halyqaralyq bilim ortalyǵy, zamanaýı akademqalashyq, kópsalaly medısınalyq klaster boı kóteredi. Sonymen qatar «Hyundai Green Food Almaty» jáne «Mars» sııaqty álemdik kompanııalardyń jobalaryn júzege asyrý josparlanǵan.
«Growing District» «Almaty – Qapshaǵaı» avtojoly boıynda jáne «Jetigen – Qazybek» temirjol jelisiniń mańynda ornalasady. Bul aımaq eksportqa baǵyttalǵan óndiristik jáne logıstıkalyq ortalyq retinde damytylady. Kólik dálizderiniń toǵysynda ornalasýy jáne áýejaıǵa jaqyndyǵy ekologııalyq taza óndiristerdi damytýǵa erekshe múmkindik beredi.
Qanat Bozymbaev bul jerde halyqaralyq «Rhenus Logistics» kompanııasynyń basshylyǵymen kezdesip, Alataýda kólik-óndiristik hab qurýdaǵy yntymaqtastyq máselelerin talqylady. Aýmaǵy 31 730 gektardy quraıtyn «Green District» Qapshaǵaı sýqoımasymen, Qaskeleń ózenimen jáne Qonaev qalasymen shektesedi. Munda kýrorttyq aımaqtar men saıabaqtar salynyp, bolashaqta «Formýla-1» jarys tasjoly, «Iconic Building-2» týrıstik ortalyǵy boı kóteredi. Bul aımaq Almaty aglomerasııasynyń basty týrıstik jáne demalys ortalyǵyna aınalmaq.
Jumys sapary barysynda Qanat Bozymbaev mınıstrlikter ókilderi, ınvestorlar, bıznes qaýymdastyǵy, halyqaralyq sarapshylar jáne Prezıdenttiń shtattan tys keńesshisi Vong Hen Faınnyń qatysýymen Jobalyq ofıs otyrysyn ótkizdi. Jıynda otandyq jáne sheteldik ınvestısııalardy qorǵaý, kelisimsharttardyń turaqtylyǵyn qamtamasyz etý, Qytaıdyń «CRDI» kompanııasymen birlesken keńes berý tetikteri, Alataý qalasynyń damý keńesin qurý jáne «Alatau City Authority» memlekettik qorynyń Jarǵysyn bekitý sııaqty máseleler qaraldy. Sonymen birge Memleket basshysynyń Alataý qalasyn damytý jónindegi Jarlyǵynyń oryndalý barysy jáne «Alataý qalasynyń arnaıy mártebesi týraly» Konstıtýsııalyq zań jobasynyń oryndalý barysyn da talqylady.
Kezdesý qorytyndysynda vıse-premer jaýapty memlekettik organdarǵa Alataý qalasyn damytýda keshendi tásil qoldanýdy jáne tıimdi úılestirýdi qamtamasyz etýdi tapsyrdy.
Almaty oblysy
