Osymen úshinshi márte uıymdastyrylǵan saıys úsh kúnge ulasyp, 10 sport túrinen 167 bala qatysty. Ár aımaqtan kelgen balalar asyq atý, toǵyzqumalaq, bestemshe sııaqty ulttyq oıyn túrlerinen saıysqa tústi. Júzý, shaǵyn fýtbol, ústel tennısi, jeńil atletıka, shahmat, boýlıng jáne nysana kózdeýden de sheberlikterin kórsetti.
Is-sharany «Fenıks» qoǵamdyq qory men UMC Korporatıvtik qory tize qosyp uıymdastyrdy. Oqý-aǵartý mınıstrligi men KAZ Minerals Management kompanııasy bas seriktes bolǵan qaısar balalardyń oıyndaryna Densaýlyq saqtaý mınıstrligi, Týrzım jáne sport mınıstrligi, Astana qalasynyń deneshynyqtyrý jáne sport basqarmasy, QR Ulttyq ulannyń basshylary da qoldaý kórsetti. Sporttyq saıystar Ál-Farabı atyndaǵy Oqýshylar saraıynda, «Alaý» muz aıdynynda jáne «Pingwin» boýlıng ortalyǵynda ótti. Júldeger atanǵan qatysýshylarǵa Qaisar Games medaldary men gramotalary tabystaldy. Sporttyq jarystardan syrt balaqaılar Ailand otbasylyq demalys ortalyǵynda sheberlik saǵattaryna qatysty. Saıys barysynda erekshe balalardyń ata-analary da ýaqytyn tıimdi ótkizdi. Akterlik sheberlik, bı óneri mamandarynyń sheberlik sabaǵyna qatysyp, psıhologııalyq dáristerdi tyńdady. Igi sharanyń saltanatty jabylý rásiminde sóz alǵan dárigerler qaterli aýrýlardy jeńgen balalardyń qaısarlyǵyn árdaıym úlgi tutý mańyzdy ekenin atap ótti.
Qaisar Games sporttyq oıyndarynyń basty maqsaty – onkologııalyq aýrýlardy, súıek kemigi syndy kúrdeli syrqatty jeńgen, aǵza transplantasııasy jasalǵan jetkinshekterdi ońaltý máselesine qoǵam nazaryn aýdarý. Balaqaılardyń da qatarynan qalmaı belsendi ómirge beıimdelýine qoldaý kórsetý.
О́kinishke qaraı, elimizde jyl saıyn 600–640 baladan onkologııalyq aýrýdyń belgileri anyqtalady. Qazirgi tańda 5 000-nan astam bala turaqty baqylaýda tur. Medısına ǵylymynyń jetistikteri men otandyq dárigerlerdiń kásibı biliktiliginiń nátıjesinde onkologııalyq aýrýǵa tap bolǵan balalardyń densaýlyǵy da jaqsaryp. Dese de dárigerler medısına salasynyń jetistiginen keıin syrqatynan aıyqqannan keıin balalar qoǵamda oqshaýlanyp qalatynyn alǵa tartady. Emdelýden keıin balalar men olardyń ata-analaryna júıeli qoldaý kórsetý mańyzdy. Áleýmetten oqshaýlanyp, psıhologııalyq kúızeliske ushyraǵan jandar árdaıym demeýge zárý. QAISAR GAMES – bul jaı ǵana medal úshin jarys emes. Sharanyń basty mıssııasy – emdeýden keıingi ońaltý sharalaryn kúsheıtý deıdi uıymdastyrýshylar. Saıysqa qatysqan balalar psıhologııalyq, fızıkalyq jáne áleýmettik turǵydan qoldaý kórip, shattyqqa keneldi. Igi shara aldaǵy ýaqytta da jalǵasyn tappaq.
