Fınaldyq oıyndardyń saltanatty ashylý rásiminde QR Joǵarǵy Soty azamattyq ister jónindegi sot alqasynyń tóraǵasy Nurserik Sháripov, QR Sýdıalar Odaǵynyń tóraǵasy Dosjan Ámir sóz sóılep, atalǵan sporttyq is-sharanyń mańyzdylyǵy jóninde aıtyp, barlyq qatysýshylarǵa sáttilik tiledi.
– Sýdıalar spartakıadasy – bul tek sporttyq báseke ǵana emes, sonymen qatar elimizdiń sot júıesinde qyzmet etetin azamattardyń dostyǵyn, kásibı yntymaqtastyǵyn jáne birligin kórsetetin mańyzdy is-shara. Salaýatty ómir saltyn qalyptastyrý, dene tárbıesin nasıhattaý, belsendi ómir súrý mádenıetin damytý – spartakıadanyń basty maqsattarynyń biri. Sonymen qatar, bul doda áriptester arasyndaǵy rýhanı baılanysty nyǵaıtyp, sot júıesiniń adamgershilik jáne qoǵamdyq birtutastyǵyn aıqyndaıdy. Osy jolǵy spartakıada óziniń aýqymdylyǵymen, joǵary deńgeıde uıymdastyrylýymen jáne qatysýshylardyń belsendiligimen erekshelendi. Osyndaı saıystar arqyly biz kásibı áleýetimizdi de arttyra túsemiz, – dedi QR Sýdıalar Odaǵynyń tóraǵasy Dosjan Ámir.
