Almatylyq klýbtyń áıgili «Real Madrıd» fýtbolshylaryna qarsy tartysy da tarıh jylnamasyna jazyldy. Matchta «Qaırat» oıynshylarynyń 0-5 esebimen utylýy eldegi fýtboldyń deńgeıi qaı shamada ekenin ańǵartty. Dese de almatylyq klýbtyń elge fýtbol merekesin tartý etip, ÝEFA Chempıondar lıgasynyń jalpy kezeńine at baılaýy da zor mártebe.
24-mınýtta Kılıan Mbappe penaltıden gol soǵyp, esep ashqan soń da, «koroldik klýb» aıylyn jıǵan joq. Kerisinshe, 1-taımnyń sońyna deıin basymdyqty ústemelep, qysymdy kúsheıte tústi. 2-taımda soǵylǵan 4 gol da qorǵanysta oınaıtyn fýtbolshylardyń qaýqarsyzdyǵyn áıgilep berdi. Jasyndaı jarqyldaǵan Mbappe 52-mınýtta ekinshi, 73-mınýtta úshinshi golyn soǵyp, enshisine het-trık jazdy. Kamavınga 83-mınýtta esep aıyrmasyn 0-4-ke jetkizdi. Tegeýringe odan beter ekpin qosqan Braım Dıas 90+3-mınýtta besinshi goldy soqty.
«Qaırattyń» jas qaqpashysy Sherhan Qalmyrza jaýapty matchta orasan qysymǵa shydas berdi. Syn sátte sheberlik tanytyp, birneshe joıqyn soqqylardy qaıtardy. Jankúıerdiń ystyq yqylasyna bólengen bozbalaǵa oıynnan keıin «Real Madrıdtiń» qaqpashysy Tıbo Kýrtýa jeıdesin berdi. Bul jyly kórinisti jankúıerler jaqsy yrymǵa balady.
Jetistigi jetpis atannyń belin qaıystyrar deńgeıdegi klýbpen tartysqa túsken fýtbolshylarymyzǵa bul doda shyńdalý mektebi bolǵany anyq. Ásirese «Qaırat» akademııasy túlekteriniń fýtbol skaýttarynyń nazaryna ilinýine zor múmkindik týdy. Matchtan keıingi baspasóz máslıhatynda «Qaırattyń» bas bapkeri Rafael Ýrazbahtın mundaı tegeýrindi ujymǵa qarsy oınap, orasan tájirıbe jınaǵanyna toqtaldy.
«Eki klýbtyń arasalmaǵy, deńgeıi jer men kókteı. Biz múmkindiginshe qarymta shabýyldy óristetýge umtyldyq. Jigitter «Real Madrıd» klýbynyń qorǵanysyn synalap buzýǵa tyrysty. Dopqa ıelik etýde, pas berýde, alańdy kóre bilýde olar klassıkalyq oıyn úlgisin kórsetti. Oıynshylarymyz álemniń tańdaýly fýtbolshylarymen tartysqa túsip, sheberligin shyńdady. Árıne, iri eseppen jeńilgenimiz janymyzǵa batady. Bizge júktelgen mindet – bıylǵy maýsymda el chempıony ataný. Alda Premer-lıganyń úsh mańyzdy matchy bar. Qalaıda mol upaı enshilep, ishki chempıonatta úzdik atanýǵa barymyzdy salamyz. Odan bólek, ÝEFA Chempıondar lıgasynyń jalpy kezeńindegi oıyndar da bar. Jigitter birer kún tynyǵyp, jattyǵýǵa qaıta kirisedi. Senim artqan basshylyqtyń, jankúıerdiń úmitin aqtaýǵa barymyzdy salamyz», dedi R.Ýrazbahtın.
«Real Madrıd» klýbynyń bas bapkeri Habı Alonso «Qaırat» fýtbolshylarynyń jigerine tánti etkenin aıtty. «Bizdiń jigitter oıynnyń bastapqy mezetinde abdyrap ta qaldy. Stadıonǵa jınalǵan jankúıerdiń óz komandasyna qoldaýy da erekshe boldy. Almatylyq klýbtyń Chempıondar lıgasyndaǵy saparyna sáttilik tilep, tileýlestigimdi bildiremin. Almatyǵa kelgennen bastap zor yqylaspen qarsy alyp, erekshe qonaqjaılylyq tanytty, tamasha aýrany sezindik», degen H.Alonso Almatynyń tabıǵaty da erekshe áser etkenin jetkizdi.
1992 jyldan ulttyq quramanyń, «Qaırattyń» kapıtany bolǵan fýtbol ardageri Asqar Qojabergenov talantty izbasarlarynyń jetistigine árdaıym maqtanatynyn, komandanyń Chempıondar lıgasynyń jalpy kezeńinde oınap, tarıhı nátıjege qol jetkizgeni el fýtbolynyń mereıi ekenin aıtty.
«Fýtbol toıynda álemdik deńgeıdegi juldyzdar jankúıerlerge erekshe kóńil-kúı syılady. Match aldynda suhbat alǵan jýrnalısterge qorǵanysqa búrkenip jatyp almaı, shabýyldaý qajet ekenin aıtyp edim. «Real Madrıd» álemdegi úzdik klýbtardyń qataryndaǵy óte tegeýrindi ujym. ÝEFA Chempıondar lıgasyn 15 márte enshilegen klýb. Biraq ataǵynan qaımyqpaı, qarymta shabýyldy údetip, minez tanytý kerek ekenin bári de uǵyndy. Jigitter baryn salyp oınady. Qarsylas klýb oıynshylarynyń dańqynan da qaımyqqan joq, shabýyldap, urymtal sátti múlt jibermeýge tyrysty», dedi A.Qojabergenov. Fýtbol ardageri komanda qaqpashylarynyń álem nazaryn aýdarýy klýbtaǵy qaqpashylardy baptaıtyn ujym eńbeginiń nátıjesi ekenin de atap ótti.
«Qaırat» ÝEFA Chempıondar lıgasynyń jalpy kezeńindegi úshinshi týr matchyn óz alańynda ótkizedi. 21 qazanda kıprlik «Pafos» klýbyn qabyldaıdy.
