Foto: Aqorda
Aqordaǵa aıaq basqan jaýapty mamandyq ıeleri «Parasat», «Qurmet» ordeni, «Eren eńbegi úshin» jáne «Shapaǵat» medalimen marapattalyp, «Qazaqstannyń eńbek sińirgen ustazy» qurmetti ataǵyn arqalady.
Bedeli bıik marapat alǵan ustazdardyń qatarynda Shymkent qalasy T.Tájibaev atyndaǵy №47 mektep-gımnazııanyń qazaq tili men ádebıeti páni muǵalimi Sheralhan Gúlmıra da bar. Bilikti ustaz el bolashaǵyna sińirgen eren eńbegi úshin buǵan deıin «Y.Altynsarın» tósbelgisin ıemdenip, byltyr ǵana «Úzdik pedagog-2024» baıqaýynyń respýblıkalyq kezeńinde top jarǵan. Al bul jolǵy mártebeli marapat «Qazaqstannyń eńbek sińirgen ustazy» qurmetti ataǵyn izdenimpaz pedagogke el Prezıdentiniń ózi tabystady.
Sheralhan Gúlmıra ustaz marapattan keıin ádemi áserimen bólisip, baǵalanǵan eńbek ustazdyq qyryn ushtaı túsýge ıtermelep, shabytqa shabys qosatynyn aıtty.
«El basshysynyń pedagogterdi arnaıy marapattaýy ustaz roliniń joǵary ekenin kórsetedi. Bul muǵalim jetistiginiń bıigi ǵana emes, kerisinshe jańa bastamalar men tyń ıdeıalardyń bastaýy. Bizge artylǵan senim. Marapattaý sátinde oıyma túrli ıdeıalar keldi. Erterek júzege asyrýǵa asyqtym. Shabyttanyp, mamandyǵymdy adaspaı tapqanyma qýandym. Ár marapattyń jaýapkershiligi bar, artar júgi bar. Bilimimiz ben tájirıbemizdi elimizdiń jarqyn bolashaǵyna arnaımyz dep senimmen aıta alamyn», degen ustaz endi Qasym-Jomart Kemeluly basa nazar aýdaryp júrgen JI múmkindikterin der kezinde meńgerip, zaman suranysyna saı bolýdy dittep otyrǵanyn atap ótti.
«Maqsat – básekege qabiletti urpaq tárbıeleý. Olaı bolsa, muǵalim de qazirgi jahandanýdyń qatań talaptaryna saı bolýy tıis. Aqparattyq tehnologııalardyń damyǵan ýaqytynda fýnksıonaldyq saýattylyǵy joǵary, JI jetistikterin meńgergen ustaz ǵana shákirtin bıik belesterge jeteleı alady», dedi Shymkent qalasy T.Tájibaev atyndaǵy №47 mektep-gımnazııanyń muǵalimi.
Qazaqtyń áıgili áskerı qolbasshysy Baýyrjan Momyshuly «Bolashaqtyń basshysyn da, danasyn da, ǵalymyn da, eńbekqor eginshisin de, kenshisin de ustaz ósiredi, ómirge urpaq bergen analardy qalaı ardaqtasaq, sol urpaqty tárbıeleıtin ustazdardy da solaı ardaqtaýǵa mindettimiz» degen ónegeli sózimen ósıet etkenindeı shákirtteriniń sanasynda bilim shamshyraǵyn jaǵyp júrgen ustaz eńbeginiń elenýi tutas qoǵamnyń qurmeti, alǵysy.
