Keshe teatrda «Rıgoletto» premerasynyń ótýine oraı óner ujymynyń jýrnalıstermen arnaıy baspasóz máslıhaty ótti.
Elordada ótken premeranyń basty ereksheligi nede? Oǵan dúnıejúzilik óner sahnalarynda jarqyraı tanylǵan maıtalmandardyń qatysýy aıryqsha ete túsedi. Onyń biri – ońtústik koreıalyq barıton Chjýnhek Felıks Paktyń qatysýy.
Baspasóz máslıhaty kezinde spıkerler osy operanyń patsha kóńildi kórermenniń júregine jetýi úshin ózge týyndylarǵa uqsamaıtyn ereksheligin, qarama-qaıshylyqqa toly qyzyqty sıýjetin, partııalardy oryndaǵan óner maıtalmandarynyń úlken sahnadaǵy orasan eńbegin aıryqsha atap ótti.
«Rıgolettodaı» sırek, kúrdeli operanyń «Astana Opera» sahnasynda qoıylýy – óner keńistigindegi eleýli oqıǵanyń biri. Mýzykasy men qoıylymy, jarqyn kostıýmderi úılesken, shyn máninde sahna juldyzdary jarqyraǵan operalyq shyǵarma – tek teatrdyń ǵana emes, álemdik mádenıettiń eń eleýli oqıǵalarynyń biri edim, sondyqtan da astanalyq kórermenderdi, qonaqtarymyzdy osyndaı baqytty sátke bólegimiz keldi, taǵy bir keremet týyndymyzben qýantqymyz keldi», dedi «Astana Opera» dırektory Aleksandr Sovostıanov.
«Djýzeppe Verdı shyǵarmadaǵy árbir partıtýrany, árbir notany qanymen, janymen jazǵan tańǵajaıyp maestro. Onyń shyrqalǵan árbir áýeni adamzatty tuńǵıyq, tereń izdeniske, bıik maqsattarǵa jeteleıdi. Shyǵarma sonysymen de qundy», deıdi qoıýshy dırıjer, «Astana Operanyń» bas dırıjeri Alan Bóribaev.
Qoıýshy rejısser Arno Bernardyń aıtýynsha, «Eki saǵattan astam ýaqytqa sozylatyn shyǵarmany tyńdaǵan, kórermeni bolǵan adamnyń jan dúnıesinde ózgerister bolyp, tylsym kúı keshedi, ónerdiń qudirettiligi sondaı, tamaǵyńa ashy óksik tireledi» dep aqtaryldy.
Dekorasııalar boıynsha sýretshi Rıkkardo Masıronı, kostıýmder boıynsha sýretshi Anna Verde operany qoıý barysynda kezdesken shyǵarmashylyq prosess týraly qyzyqty aıtyp ótti.
Premeranyń aldyn ala kórsetilimi kezinde Rıgoletto partııasyn oryndaýshy, «Astana Opera» teatryndaǵy opera trýppasynyń dırektory Talǵat Musabaev pen Gersog partııasyn oryndaýshy, opera solısi Jan Tapınniń sahnadaǵy jarqyn beınesine, bıik ónerdiń saltanatyna taǵy da kýá bolyp, álemdik shedevr dúnıeniń qazaq sahnasynda úılesim tapqanyna qýanyp qaıttyq. Bekzat ónerdiń ómirsheńdigin sezindik.
Gúlshat SAPARQYZY.
