Aıgúlmen jaqyn aralasýym 2011 jyly kúzde bastaldy. Ol Astanada «Halyq sózi» gazetinde qyzmet istep júrgende menen suhbat aldy. Qazaq «Jylqy kisineskenshe, adam sóıleskenshe» deıdi. Biraq áýelde sypaıylyqpen sózderi jarassa da, bir-birimen ishki qaıshylyq sheńberinen shyǵa almaı, jan saraıynyń mazmuny qabysyp, ózara úndesip ketpeıtin salqyndyq bolady. О́ıtkeni jer betinde tek dúnıetanymy uqsas, rýhanı nıettes adamdar birin-biri shyn baǵalaıdy ári sol qadir tutar ardaqty jandardy ajalǵa qımaıdy. Sol qımastyq saǵynysh bekerden-beker týmaıdy, dúnıede shyn syılastyqqa jeter asyl qazyna joq.
23 shilde kúni Almatyǵa poıyzben óz sharýammen kele jattym, bılet erterek alynǵan. Qalaǵa kire bere telefonmen qaraly habar jetti. Aıgúl Ahanbaıqyzy ómirden ozǵanyn estý maǵan aýyr tıdi. Onyń ómirge degen qushtarlyǵy erekshe bolatyn, eń aqyryna deıin tirshilikten úmit úzbeı, aýyr naýqaspen alysyp, jyldar boıy emdeldi. Janazaǵa barǵanda ishteı qımas adamdardyń bir-birine tartylys kúshi, qazaqy baýyrmaldyq týraly oıladym. Dál osy kúnge tap kelgenim kezdeısoqtyq bolmaı shyqty. Tirisinde aýzynan shyqqan árbir oıly, tereńinen tolǵanyp, taldap-zerdelep, sıtýasııany dál tanyp aıtatyn pikirine súısinip, kóńil túpkirinde eshteńe jasyrmaı sóılesetin jan men úshin Aıgúl bolatyn.
Aıgúldiń jazbalary bir-birine uqsamaıdy. Ol Astanada birer jyl turǵan soń otbasymen Almatyǵa qaıta oraldy. Telefon arqyly sóılesip, ara-tura kezdesýdiń sáti tústi. Qazirgi qoǵamda koých degender alǵa sýyrylyp shyqty. Olar bilim satady, elge aqyl-keńesin aıtyp, psıhologııalyq kómek, jol kórsetýge beıimdelgen platformany ustaıdy.
Aıgúl Ahanbaıqyzynyń jaza almaı ketken kitaby, kókirek kózinde saırap, tuma-bulaq kózindeı tunyp turǵan, kerek kezinde lyqsyp shyǵa keletin psıhologııalyq zerdeleý-talqylaý qabiletimen artyq, qazirgi qazaq qoǵamyna óte kerek kitap bolatyn. Aıgúl Eýropa nemese orys psıholog mamandardyń daıar kózqarasymen aıtpaıdy, ne nárse bolsyn ulttyq mentalıtetke negizdep, eldik kózben aıqyndaıtyn edi. Telefonmen ár sóılesken saıyn men oǵan únemi: «Aıgúl, sen jańa ǵana ultqa óte qajet kitaptyń bir taraýyn aýyzsha aıtyp berdiń. Endi otyra qalyp, umytpaı turǵanda osyny jazshy, tez noýtbýkke túsirshi», deıtinmin. Eń qyzyǵy, osy sózdi oǵan aıtpaǵan kezim sırek. Eger shyn laıyq bolmasa, mundaı sózdi aıtyp nem bar. Aıgúl buǵan aqyryn kúletin de qoıatyn. Tamyzdyń basynda Aıgúl Astanaǵa tańǵy reıspen em alý úshin ushyp keldi. Men odan qazaq jazýshylarynyń qyrǵyz tilinde shyqqan antologııasyn ala kelshi dep suraǵan edim. Sońǵy júzdesý eken, boı jazyp, qoshtasý úshin kelgendeı.
Aıgúl Ahanbaıqyzynyń shyǵarmashylyq eńbegi elenip, «Nur-Suńqar» syılyǵy jáne «Qurmet» ordenimen marapattaldy. Berekeli otbasynda súıikti jar, balajan, aıaýly ana atanǵany Aıgúldiń eń úlken baqyty bolatyn. Mańdaıyna 53 jas jazylǵan qazaqtyń tekti qyzy, meıirban, bilimdi, oıly, aqyldy, elge syıly, jarqyn jan ekeni kúmánsiz. «Whats App»-tan týystaı bolyp ketken shynaıy dostyń daýys arqyly jibergen sózderin qaıta-qaıta tyńdaǵanda ol maǵan tiri sııaqty áser etti. Adam rýhy ólmeıdi.
Aıgúl Kemelbaeva,
jazýshy
