Ulttyq joba aıasynda salynǵan mektepter ata-analar tarapynan joǵary baǵalanyp jatyr. Mysaly, Shardara aýdany, О́teǵul eldi mekeninde ornalasqan №3 jalpy bilim beretin mektep ata-analarǵa arnaıy ashyq esik kúnin uıymdastyrdy. Mektepte bir aýysymda 300 oqýshynyń bilim alýyna barlyq jaǵdaı jasalǵan. Jańa mektep zamanaýı talaptarǵa saı. Pán kabınetteri tolyq jabdyqtalǵan. STEM-zerthanalar, bıologııa, hımııa, fızıka kabınetteri tájirıbelik sabaqtarǵa arnalǵan qural-jabdyqtarmen qamtamasyz etilgen. Shara barysynda ata-analar mekteptiń ishki tártibimen, oqý kabınetterimen, zamanaýı jabdyqtalǵan synyptarymen jáne oqýshylardyń jan-jaqty damýyna arnalǵan qosymsha úıirmelermen tanysty. Mektep dırektory Erkináli Aqberdıev bul bastama ata-analar men mektep arasyndaǵy ózara baılanys pen senimdi nyǵaıtatynyn alǵa tartty.
– Bizdiń maqsatymyz – árbir oqýshyǵa sapaly bilim berip qana qoımaı, olardyń jan-jaqty damýyna jaǵdaı jasaý. Búgingi ata-analarmen kezdesý – senimdi seriktestik ornatýǵa baǵyttalǵan mańyzdy qadam. Balanyń tabysty bolýy – mektep pen ata-ananyń birlesken eńbeginiń nátıjesi. Memleket basshysy Qasym-Jomart Toqaevtyń pármenimen qolǵa alynǵan «Keleshek mektepteri» ulttyq jobasynyń sharapatyn bizdiń eldi meken turǵyndary da kórip otyr. Buǵan deıin aýyldaǵy bilim uıasy úsh aýysymdy mektep qataryna enýge shaq qalǵan edi. Jańa keleshek mekteptiń salynýy – aýyl balasynyń bilimin jetildirýge taptyrmas múmkindik beredi. Munda oqýshylardyń shyǵarmashylyq jáne sporttyq áleýetin damytý úshin horeografııa zaly, zamanaýı talaptarǵa saı sport zaly men sport alańy, mýzyka kabınetteri ulttyq jáne klassıkalyq aspaptarmen jabdyqtalǵan. Beıneleý óneri jáne grafıka kabıneti, tamaqtaný mádenıeti kabıneti, eńbekke baýlý sheberhanalary qarastyrylǵan. Kitaphana, ashana, májilis zaly, kovorkıng jáne demalys aımaqtary bar. Jańa mektep árbir oqýshyǵa tek sapaly bilim alýǵa ǵana emes, sonymen qatar ǵylymmen, ónermen, sportpen jáne eńbekpen aınalysýǵa tolyq múmkindik beretin zamanaýı bilim ordasyna aınalady, – deıdi mektep dırektory.
Ashyq esik kúni ata-analarǵa oqý úderisiniń erekshelikteri, sıfrlyq bilim berý platformalaryn qoldaný tártibi jáne oqýshylardyń tárbıelik is-sharalarǵa qatysý múmkindikteri jaıynda tolyq aqparat berildi. Sonymen qatar mektep ashanasy, sport zaly men kitaphanasy kórsetilip, oqýshylardyń densaýlyǵy men bos ýaqytyn tıimdi ótkizýine jasalǵan múmkindikter tanystyryldy. Ata-analar jańa mekteptiń zamanaýı talaptarǵa saı salynǵanyn, oqý-tárbıe úderisin tıimdi uıymdastyrýǵa jaǵdaı jasalǵanyn aıtty. «Búgingi tanystyrý sharasy bizge úlken áser qaldyrdy. Jańa mekteptiń oqý kabınetteri keń, zamanaýı jabdyqtalǵan. Ásirese balalardyń qaýipsizdigi men damýyna barlyq jaǵdaıdyń qarastyrylǵanyna qýanyp otyrmyz. Osyndaı ortada óskeleń urpaqtyń bilimge degen yntasy arta túsetinine senimdimiz. Jańa mekteptiń ár buryshy balalardyń ıgiligi úshin utymdy paıdalanǵan. Bos ýaqyttarynda, úzilis kezin tıimdi paıdalanýǵa bolady. Endi barlyq jaǵdaıy jasalǵan osyndaı mektepte balalarymyz tek bilim alý kerek. Balalardyń ıgiligi úshin jasalǵan myqty joba», deıdi ata-analardyń biri. Mundaı kezdesýler aldaǵy ýaqytta da dástúrli túrde jalǵasyn taýyp, mektep pen ata-analar arasyndaǵy baılanysty arttyrýǵa baǵyttalmaq.
Túrkistan oblysy
