Tatıana Sergeevnanyń tili qazaqsha shyǵypty. Sodan ózi de qazaq mektebinde oqýdy armandaıdy. Qyzylorda qalasyndaǵy №179 qazaq orta mektebiniń tabaldyryǵyn attap, mektebiniń «juldyzyna» aınalyp shyǵa keledi. Oqý úlgerimi boıynsha da úzdik, qoǵamdyq is-sharalarǵa da belsendi bolady. Qarshadaıynan qazaq tilin súıgen ol óleń-jyrǵa qumartyp ósedi. Kitap oqý súıikti isine aınalady. Osylaısha, mektepte júrip-aq muǵalim bolýdy ómirlik maqsaty etedi. Ásirese súıikti ustazdary – bastaýysh synyp muǵalimi Baǵymgúl Úsenǵalıeva men qazaq tili jáne ádebıeti pániniń muǵalimi Malıka Asamuratova osy bir mártebeli mamandyqty tańdaýǵa úlken úlesin qosyp, jol kórsetipti.
E.Bóketov atyndaǵy Qaraǵandy ýnıversıteti, sonyń ishinde fılologııa fakýltetinde myqty mamandar shoǵyrlanǵany, jalpy dáýirlep turǵany jer-jerge taraıdy. Muny estip alǵan jap-jas Tatıana qalaıda osy oqý ornynyń stýdenti atanýdy oılap, baryn salady. Qyzylordadan arman qýyp Qaraǵandyǵa kelgen Tatıana Sergeevna osylaısha, oqýǵa túsip, esimine syrttaı qanyq bolyp ósken elge belgili ǵalym-ustazdardan tálim alady.
Ýnıversıtet ustazdary da jalyndap turǵan ýkraın qyzynyń qazaq tiline degen mahabbatyn, qurmetin birden sezinip, yqylaspen qabyldaıdy. Sol bir sáýleli sátterin ulaǵatty ustaz bylaı esine alady:
«Qaraǵandyǵa kelgenimde úlken qorqynysh boldy. Biraq ustaz bolý degen uly armanym sonyń bárin jeńe bildi. Ýnıversıtet oqytýshylary alǵashynda ań-tań bolǵany bar. Kádimgi qazaq qyzdarynan kem sóılemeıtinimdi kórip, qoldaý kórsetti. Ásirese qazaq tili grammatıkasynan sabaq bergen Shapaǵat Jalmahanov ákemdeı qamqorlyq kórsetti. Ol kezde fakýltet dekanynyń orynbasary edi. Sabaq berý metodıkasy, til stılıstıkasy, grammatıkasy, til mádenıeti salalary boıynsha saýatymyzdy ashty. Ár dárisinde táptishtep túsindiretin edi. Sol oqyǵanymyzdyń barlyǵy ustazdyq jolymyzda kádege jarap keledi. Sóıtip, súıikti ýnıversıtetimizden tek muǵalim ǵana emes, qazaq tiliniń janashyry ári zertteýshisi bolyp shyqtyq», deıdi Tatıana.
Talapty Tatıananyń Qaraǵandyǵa kelgen qadamy qut bolyp, Qudaıbergen áýletine kelin bolady. О́mirlik joldasy Sábıtpen jolyǵyp, shańyraq qurady. Qazir áýletinde ónegeli kelin, aıaýly jar, ardaqty ana.
Ýnıversıtetti úzdik bitirgen jas mamandy ári jas ǵalymdy kez kelgen mektep qushaq jaıa qarsy alady emes pe? Osylaısha, eńbek jolyn Qaraǵandydaǵy №47 mektepte bastaǵan ol Abaı aýdanyndaǵy №10 mektep-gımnazııasynda, №14 mektep-lıseıinde shákirtterine bilim beredi. Odan soń ómiriniń bir bólshegindeı bolǵan ǵylym salasyna da oıysýdy oılastyryp, Ádilet mınıstrliginiń Zańnama jáne quqyqtyq aqparat ınstıtýtynda eńbek jolyn jalǵastyrady.
Qazir Qaraǵandydaǵy «Ádilet» bolashaq mektebinde qazaq tili men ádebıeti pániniń muǵalimi bolyp, sabaq berip júr. Onymen qosa, atalǵan mektep dırektorynyń oqý-tárbıe jónindegi orynbasary. Ǵylymǵa baýlyǵan shákirtteriniń aldy bedeldi ustazǵa aınalyp úlgergen.
Qazir de qazaq tiliniń mártebesin kóterýde de aýqymdy jumys atqaryp júr. Ǵylym men bilimdi qatar ushtastyryp júrgen ulaǵatty ustazdyń ustanymy da uly: Ana tilge qurmet – Alashqa qurmet!
Qaraǵandy oblysy
