Kenshiler áýleti

Shahtınsk qalasynyń ir­gesindegi «Qarmet» kompanııa­syna qarasty «Qazaqstan» shahtasy bul otbasynyń ekinshi shańyraǵy ispetti. Áýlettiń shahtadaǵy dáýiri dańqty kenshi Sembi Absatovtyń «Dolınskaıa» shahtasyna jumysqa ornalasýymen bas­talady. Sembi keıin óziniń baýyrlaryn da qasyna jumysqa tartady. Búginde kenshiler áýletiniń úshinshi býyny da abyroıly mamandyqty mıras etip, atalarynyń dástúrli jolyn jarastyqty jalǵap keledi.

«Otbasymyzda segiz aǵaıyn­dymyz. Ákemiz Absat ómirden erte ótti. Anamyz bizdi jalǵyz ózi ósirip-tár­bıeledi. Shahtaǵa eń birinshi bolyp aǵalarymyz Sembi, odan keıin Sembek pen Keńes jumysqa ornalasady. Keńes aǵa «Qazaqstan» kenishinde relsti tasymaldaý bóliminiń elektrovoz mashınısi bolyp 53 jyldan astam eńbek etti. Sembi shahtanyń relsti tasymaldaý bóliminiń jerasty oqpanshysy bolyp 48 jyldan astam ýaqyt shahtada jumys istedi. Meniń de eńbek ótilim 40 jylǵa jýyqtady. Bul bizdiń otbasylyq mamandyq dese de bolady. Áıelim Sáýle de, baýyrlarym men kelinderim de osy kenishte eńbek etedi»,  deı­di maıtalman kenshi Maral Jampeıisov.

Búginde M.Jampeıisov «Qazaqstan» kenishi ká­sipodaq komıtetiniń tór­aǵasy. Jary Sáýle Jam­peıisova kenishtiń avtomatıka jáne baılanys bóliminde telefonıst bolyp jumys isteıdi. Absatovtar áýletiniń úshinshi býyny Talǵat, Janat, Murat, tórtinshi býyn Janat Absatovtyń uly Álibek Abaev pen kelinderi Ǵaını, Rymbala, Gúlnazııa da osy kenishte eńbek etip, kómir óndirisiniń órkendeýine úles qosyp júr.

M.Jampeıisov – I, II, III dárejeli «Kenshi dańqy» orde­niniń, «Eńbek ardageri» medaliniń ıegeri. Kómir óner­kásibiniń qurmetti qyzmet­keri.

Keńes pen jary Rymbala da «Qazaqstan» shahtasyna eńbegi sińgen jandar. Ekeýi taban aýdarmaı, otyz jyldan asa bir kenishte jumys istedi.

– Ákem 1976 jyldyń aqpa­nynda shahtaǵa qatardaǵy ju­mysshy bolyp kirdi. Keıin elektrovoz mashınısin oqyp, 2007 jylǵa deıin osy qyzmetin abyroımen atqardy. II, III dárejeli «Eńbek dańqy» ordeniniń ıegeri. Qazirde qurmetti zeınet demalysynda. Anamyz Rymbala 1979 jyly shahtaǵa zańger bolyp ornalasyp, 2008 jylǵa deıin eńbek etti, – deıdi Talǵat Keńesuly.

Talǵattyń ózi de áke jolyn jalǵap, 1998 jylǵy tamyzda shahtaǵa taý-ken sheberi bolyp jumysqa ornalasqan. Sodan beri Shahtınsk qalasy irgesindegi shahtanyń beldi kenshisi. Qalǵan úsh baýyry Qaraǵandy memlekettik teh­nı­kalyq ýnıversıtetin támamdap, óndiris salasynda eńbek etip júr.

Sembek «Qazaqstan» keni­shinde burǵylaýshy, jary Ǵaını lampashy bolyp eńbek etti. Aǵalary Sembiniń de balalary taý-ken salasynda. Abaı Absatovtyń uldary da atalarynyń izin laıyqty jalǵap júr.

– Janat shahtada 2003 jyldan beri burǵylaýshy bolyp jumys isteıdi. Murat 2000 jyldan bastap taý-ken qazý mashı­nısi. Janattyń uly Álisher de osydan eki jyl buryn shahtaǵa jumysqa ornalasty. Ol kenshi ǵana emes, djıý-djıtsýdan elimizdiń chempıony, qol kúresten sport sheberi, – deıdi áýlettiń úlkeni M.Jampeıisov.

Osylaısha, bútin bir áýlet­tiń «Qazaqstan» shahtasyna da, qazaq eline de eń­bekpen sińirgen úlesi zor. Eseli eńbekten abyroı tapqan aǵaıyndylardyń ata dástúrge, mamandyqqa adaldyǵy, bereke-birligi kópshilikke úlgi-ónege.

Qaraǵandy oblysy