Búginde Erbolat Tólepbaıdyń esimi elimizben birge shet memleketterde de keńinen tanymal. Ol beıneleý ónerinde qalyptasqan dástúrdi laıyqty jalǵastyryp, Ábilhan Qasteev, Gúlfaırýs Ismaılova, Jańataı Shárdenov sııaqty áıgili sýretshilerden úzilmegen sabaqtastyqty saqtaýǵa úlken úles qosyp keledi. Erbolat Tólepbaı ulttyq boıaýdy Eýropa jáne Azııa mánerimen sheber ushtastyrý arqyly elimizde qazaqy sıýrrealızmniń negizin qalaýshylardyń biri ekenin de atap ótken jón.
Máýlen Áshimbaev mereıtoı ıesi otandyq beıneleý jáne keskindeme óneriniń damýyna zor eńbek sińirgenine nazar aýdaryp, onyń shyǵarmashylyǵy jan-jaqty ekenin tilge tıek etti. Sýretshiniń dástúrge negizdelgen jáne rýhanı mazmunǵa ıe kartınalary kórkemdik ınnovasııa men mádenı jańǵyrýdy, ejelgi mıfter men zamanaýı shynaıylyqty úılestirip, biregeıliktiń mańyzyn arttyra túskeni sózsiz.
Palata spıkeri ulttyq biregeılikti dáripteý, jalpyadamzattyq qundylyqtardy qalyptastyrý, sondaı-aq ulttyq kod pen sabaqtastyqty saqtaý jolynda zamanaýı mádenıettiń jáne ónerdiń máni zor ekenin aıtty. Sondyqtan atalǵan sala Memleket basshysynyń erekshe nazarynda.
«Prezıdent Qasym-Jomart Toqaev ulttyq mádenıetimizdi damytýǵa únemi basa mán berip keledi. Búginde bul baǵytta túrli baǵdarlama men mańyzdy joba iske asyrylyp jatyr. Sonyń ishinde ulttyq mádenı muramyzdy dáripteýge arnalǵan aýqymdy is-sharalar júıeli túrde uıymdastyrylyp jatyr. Osy kórme de sondaı ıgi istiń laıyqty jalǵasy ekeni anyq. Erbolat Tólepbaı qazaq beıneleý óneriniń ilgerileýine eleýli úles qosty. Onyń ár týyndysynda úlken oı, tereń fılosofııa jatyr. Ásirese kóshpeliler dástúri men dala danalyǵy arqyly sýretshi ulttyq kod, tarıhı sana, sabaqtastyq sııaqty qundylyqtardyń mańyzyn aıryqsha dáripteıdi», degen M.Áshimbaev qylqalam sheberine izgi lebizin arnap, shyǵarmashylyq tabys tiledi.
Is-sharaǵa elimizdiń mádenıet qaıratkerleri, zııaly qaýym ókilderi jáne Sýretshiler odaǵynyń músheleri qatysyp, Erbolat Tólepbaıdy mereıli belesimen quttyqtady.
