Úıiniń tórgi bólmesine arnaıy sóreler jasap, 24 saǵat qosylyp turatyn jaryq tartqan. Bólme temperatýrasy 25 gradýs, al ylǵaldylyǵy 60–70 paıyz. Ár sórede mıkro jasyl ósimdiktiń san túri qulpyryp tur. Jetilgen jelekti tutynýshylarǵa ózi jetkizip beredi. О́simdiktiń biri kádimgi as burshaq ispetti bolsa, endi biri – qyzylsha japyraqtarynyń shaǵyn túri. Dámi de sol kókónisterden aınymaıdy. Paıdasy ushan-teńiz. Sony aspazdar túrli taǵamǵa qosyp sándeıdi, árleıdi. Meıramhanalar ǵana emes, jekelegen turǵyndar tarapynan da suranys bar. Osynaý eshkimniń oıyna kele qoımaıtyn kásip túrin Nurgúl Alpysbaıqyzy qaıdan taýyp alǵan deımiz ǵoı.
«Osydan tórt jyl buryn úıde balamen otyryp, ınternetten kásip túrlerin izdedim. Bala-shaǵaǵa qaraýyma kedergi bolmaıtyndaı jumys kerek boldy. Sóıtip júrip, mıkro jasyl ósimdikterge qyzyqtym. Áýelde bári sátti bola qoımady. Degenmen zerttep júrip, ádis-tásilin taptym. Qazir úzdiksiz ósirip, satyp otyrmyn», deıdi Nurgúl Alpysbaıqyzy.
Aıtýynsha, óskinderge erekshe kútim qajet emes. Bar bolǵany bólme temperatýrasyn rettep, ýaqtyly sýyn quıyp otyrý kerek. Álbette, tuqymdy durys tańdaǵan jón. Tuqymdy kúntizbemen sebedi. Ol da óskinniń jaıqalyp ósýine áseri bar. Bir qyzyǵy, tuqym topyraqqa emes, arnaıy mata ispetti materıalǵa egiledi. Sodan keıin júıeli túrde sýarylady, qunar beretindeı zattar qosylady. Keıbir mıkro jasyl óskinderge sýdan góri tyńaıtqysh kóbirek qajet. Kóptegen tájirıbe jasap, erinbeı eńbektengenniń arqasynda aıadaı ǵana bólmede jyl on eki aı jasyl jelek jaıqalyp turady. Mıkro jasyldardy alǵash 80-jyldary AQSh-taǵy tamaqtaný oryndarynda tutyna bastaǵan. 90-jyldardyń ortasynan bastap álemge taraǵan. Ár jasyl óskin taǵamǵa erekshe dám men hosh ıis beredi. Aspazdardyń tamaǵy sonymen de dámdi.
«Biz Nurgúlmen baıaǵydan jumys isteımiz. Onyń mıkro jasyl ónimderi sapaly. О́simdikter bir jaǵynan ádemi kórinedi. Taǵammen tartqanda dastarqandy jaınatyp jiberedi. Ekinshiden, paıdaly», deıdi sýshef aspaz Eldar Ǵafýrov.
Ǵalymdar da mıkro jasyldaǵy dárýmenniń kádimgi kókónisterge qaraǵanda 10 ese kóptigin anyqtaǵan. Sırek kásip túrimen aınalysatyn Nurgúl Alpysbaıqyzy aldaǵy ýaqytta kásibin keńeıtýdi de kózdeıdi. Eń bastysy, suranys bar.
О́skemen
