Jańa úlgi boıynsha tártibimen, kóshbasshylyq qasıetimen jáne qyzmetke degen jaýapkershiligimen erekshelengen sarbazdarǵa úshinshi biliktilik synyby men «aǵa sarbaz» mártebesi beriledi. Olar óz qaramaǵyna birneshe jas sarbazdy alyp, olardyń beıimdelýine, turmystyq jaǵdaıynyń uıymdastyrylýyna, tártip pen moraldyq-psıhologııalyq ahýaldy saqtaýǵa kómektesedi. Aǵa sarbazdar qamqorlyǵyndaǵy jas sarbazdardy mádenı jáne patrıottyq is-sharalarǵa bastap baryp, tálimgerlik jáne úlgi kórsetýshilik rólin atqarady.
Jańa júıeniń erekshe belgisi retinde aǵa sarbazdarǵa qyzyl-qońyr jolaq keýdeshe beriledi, ol olardyń qyzmet ótkerýdegi erekshe mártebesin aıqyndaıdy.
Astana brıgadasynyń basshylyǵy atap ótkendeı, bul júıe kelisimshart boıynsha qyzmettegi áskerı qyzmetshilerdiń júktemesin azaıtyp, kúndelikti tárbıe jáne baqylaý máselelerinde oń áserin tıgizýde. Qazirgi tańda 15-ten astam aǵa sarbaz kelisimshart negizinde qyzmetin jalǵastyrý múmkindigin paıdalandy. Bul olardyń áskerı qyzmetke degen yntasynyń artqanyn jáne ortaq iske qosqan jeke úlesiniń mańyzdylyǵyn tereń túsinetinin kórsetedi. Saltanatty jaǵdaıda olarǵa áskerı bólim aýmaǵyndaǵy jataqhanadan jeke bólmelerdiń kiltteri tabystaldy.
«Aǵa sarbazdar» ınstıtýtynyń engizilýi Ulttyq ulannyń Bas qolbasshylyǵynyń bastamasy jáne qoldaýy arqasynda júzege asyp jatyr. Bul qadam qyzmet ótkerý jaǵdaılaryn jaqsartýǵa, áskerı tártipti nyǵaıtýǵa jáne jeke quram arasynda ujymdyq rýh qalyptastyrýǵa baǵyttalǵan keshendi jumystyń bir bóligi.
Aıta ketý kerek, jańa júıe Astana brıgadasynda synaqtan ótkizilip jatyr. Eger tájirıbe óz tıimdiligin dáleldese, «aǵa sarbazdar» ınstıtýty Ulttyq ulannyń barlyq áskerı bóliminde engizilmek.
