Foto: istockphoto.com
Joǵarǵy Sottyń baspasóz qyzmetiniń habarlaýynsha, 2022 jyldyń naýryz aıynyń sońynda 45 jastaǵy áıel Oral qalasyndaǵy aýrýhanaǵa jedel juqpaly aýrý dıagnozymen jetkizilgen. Dárigerlerdiń emdeý sharalaryna qaramastan, naýqastyń jaǵdaıy nasharlap, bir aptadan keıin qaıtys boldy.
«Qaıǵyly oqıǵadan keıin marqumnyń anasy men ápkesi oblystyq densaýlyq saqtaý basqarmasy men aýrýhananyń ústinen moraldyq shyǵyndy birlesip óndirip alýdy surap, sotqa shaǵym túsirgen. Olar talap qoıýda jaqyndarynyń ólimine medısına qyzmetkerleriniń qyzmettik mindetterin oryndaýdaǵy salǵyrttyǵy men medısınalyq kómek kórsetý normalaryn buzýynyń saldary sebep bolǵanyn kórsetken. Talapqoıýshylar qyzy men ápkesinen aıyrylý olar úshin aýyr psıhologııalyq kúızelis bolǵanyn atap kórsetken. Úsh jyl ótse de, olar aýyr psıhıkalyq, fızıkalyq jáne emosıonaldyq azapty bastan keshirip otyr», delingen habarlamada.
Densaýlyq saqtaý mınıstrligi Medısınalyq jáne farmasevtıkalyq baqylaý komıtetiniń departamenti júrgizgen tekserý barysynda naýqasty dıagnostıkalaý, emdeý jáne baqylaý kezinde birqatar zań buzýshylyqtar anyqtalǵan. Atap aıtqanda, emdeýshi dáriger medısınalyq kómek kórsetý standarttarynan aýytqyp, kásibı mindetterin tıisti deńgeıde oryndamaǵan, sondaı-aq medısınalyq qujattardy burmalaǵan.
Ákimshilik quqyq buzýshylyq isteri jónindegi mamandandyrylǵan sot aýrýhananyń úsh dárigerin sapasyz medısınalyq qyzmet kórsetkeni úshin tártiptik jaýapkershilikke tartylǵan.
Al Batys Qazaqstan oblysy Báıterek aýdanynyń №2 soty medısına qyzmetkerleriniń áreketi men naýqastyń ólimi arasyndaǵy tikeleı sebeptik baılanysty anyqtap, marqumnyń týystary talap etken moraldyq ótemaqyny ishinara qanaǵattandyrdy. Sot sheshimimen aýrýhanadan marqumnyń anasy men ápkesiniń paıdasyna 3 mln teńgeden astam ótemaqy óndirilgen.
Sottyń sheshimi zańdy kúshine endi.
