Sýret: russian.eurasianet.org
Alǵash ret 1851 jyly Venesııada sahnalanǵan opera tereń psıhologızm men zamanaýı mýzykany ádemi úılestirgen kórkem shyǵarma. Sodan beri de qanshama ýaqyt ótse de adam namysynyń shegi, qushtarlyq kúshi jáne taǵdyrdyń qaıǵyly sharasyzdyǵy týraly máńgilik suraqtardyń jaýaby tabylǵan emes.
Qoıylymdy belgili fransýzdyq rejısser Arno Bernar sahnalady. Onyń esimi elordalyqtarǵa buǵan deıingi Gaetano Donısettıdiń «Mahabbat sýsyny» spektakli arqyly jaqsy tanys. Rejısser «Rıgoletto» operasyn qoıýǵa kóp izdengen. Ol keıipkerler beınesin túrli minezder arqyly ashady.
Máselen, Rıgoletto – qyrshańqy ári saıqymazaq. Bir jaǵynan, taǵdyry qıyn adam. Al Djıldanyń minezi batyl, qandaı qadamǵa da erkin baratyn qyz. Sondaı-aq Mantýıa gersogi – ázázil ári óktem. Qoıylymda basty partııany Qazaqstannyń eńbek sińirgen qaıratkeri Talǵat Musabaev pen arnaıy shaqyrylǵan káris barıtony Chjýnhek Felıks Pak oryndady. Ekeýi de «Rıgoletto» obrazyn tamasha somdady. Bas keıipker beınesi dramalyq qýatymen, vokaldyq ásemdigimen tańǵaldyrdy. Olar aıtqan «Cortigiani, vil razza dannata» arııasy operanyń barlyq emosııasyn dál jetkizdi. Djıldamen bolǵan dýetter de keıipker janynyń náziktigin ashyp kórsetti.
Al Djıldanyń partııasyn ýkraınalyq soprano Iýlııa Zasımova men teatr juldyzy Saltanat Ahmetova, al úshinshi kúni Leıla Alamanova naqyshyna keltirip aıtty. Osy úsheýi shyrqaǵan «Caro nome» arııasy minsiz koloratýramen, tazalyǵymen tánti etti. Ekinshi aktidegi ákesine shyndyǵyn aıtqan sáti kórermenge umytylmastaı áser qaldyrdy. Sonymen qatar Mantýıa gersogynyń partııasyn solıster Jan Tapın men Artýr Ǵabdıev oryndady. Ásirese bas hormeıster Erjan Dáýitov daıyndaǵan hor da mańyzdy ról atqardy. Saraıdaǵy shytyrman oqıǵalar sahnasynda hordyń úni anyq ári qýatty estildi.
Bul týyndyǵa álemge tanymal ónerpaz Alan Bóribaev dırıjerlik etti.
Maestro qoıylymdaǵy oqıǵalardy mýzykamen keremet ásemdedi. Sondaı-aq sýretshi Anna Verdeniń eńbegi de erekshe. Onyń kostıýmderi de sol dáýirdiń stıline saı jasalǵan.
Qysqasy, jurtshylyq qoıylym sońynda teatr ártisteriniń ónerine dán rıza bolyp, uzaq ýaqyt qol shapalaqtap, sahnadan jibermedi.
