Baır Fardenuly 1954 jyly Almaty qalasynda ómirge kelip, qazirgi Abaı oblysyndaǵy Baqty aýylynda shekarashy ofıser otbasynda ósti. Ol barlyq sanaly ómirin otandyq sáýlet salasyna arnady. Máskeýdegi sáýlet ınstıtýtyn támamdaǵannan keıin «Qazgorqurylysjoba» jobalaý ınstıtýtynda qarapaıym sáýletshiden bastap, sheberhana basshysyna deıingi joldan ótti. Budan soń Qazaq KSR Qurylys isteri jónindegi memlekettik komıtetiniń Sáýlet jáne qala qurylysy jónindegi bas basqarmasynyń basshysy boldy. Elimiz táýelsizdik alǵannan keıin Sáýlet jáne qurylys jónindegi memlekettik komıtet tóraǵasynyń birinshi orynbasary, Qurylys, turǵyn úı jáne aýmaqtardy damytý mınıstriniń birinshi orynbasary jáne Tótenshe jaǵdaılar jónindegi memlekettik komıteti tóraǵasynyń orynbasary sekildi jaýapty qyzmetterdi atqardy.
Baır Fardenuly el astanasyn Almatydan Arqa tórine kóshirýge aıryqsha úles qosty. 1995 jyly ol joǵary jáne ortalyq memlekettik organdaryn Aqmola qalasyna kóshirý jónindegi Memlekettik komıssııa tóraǵasynyń orynbasary, keıin birinshi orynbasary – Komıssııa apparatynyń basshysy laýazymyna taǵaıyndalyp, osy jaýapty qyzmetti 1998 jylǵa deıin atqardy. Al 1998–2000 jyldary – Astananyń bas sáýletshisi, elordalyq sáýlet jáne qala qurylysy departamentiniń dırektory boldy. Onyń basshylyǵymen jas astana bas josparynyń úzdik ıdeıasyna arnalǵan halyqaralyq sáýlet konkýrsy uıymdastyryldy. Sondaı-aq onyń usynysymen «Astanagenplan» jobalaý ınstıtýtyn qurý týraly sheshim qabyldady. Baır Fardenuly bul ınstıtýtty 2000 jyldan bastap, 2015 jylǵa deıin basqardy. Ol kez kelgen jumysty shyǵarmashylyq kózqaraspen atqaryp úlken bedelge ıe boldy. Bilikti sáýletshiniń tikeleı qatysýymen Astananyń bas jospary men túzetýi, elordany jáne onyń aglomerasııa aımaǵyn damytýǵa arnalǵan qala qurylysy qujattamasy ázirlendi. Elordanyń kelbetin aıshyqtaıtyn, kórikti nysandarǵa aınalǵan birneshe sáýlet baıqaýy ótkizildi. Memleket tarapynan eńbegi de joǵary baǵalandy. «Eren eńbegi úshin» medali men «Qurmet» ordenin aldy. 2008 jyly «Dóńgelek alań» sáýlettik kesheni úshin Memlekettik syılyqtyń laýreaty atandy.
Shyn máninde, Baır Fardenulynyń esimi elimizdegi sáýlet óneri men jas elordanyń qalyptasý tarıhyna altyn árippen jazyldy. Aıtýly azamat otbasynda súıikti jary men balalaryna qamqor otaǵasy boldy. Onyń izgi nıetti, zııaly, adamgershiligi mol qasıetin umytpaımyz. Baır Fardenulynyń mańdaı teri, sáýlet salasyndaǵy kásibı bastamalary elorda ǵımarattary men dańǵyldarynda sáýletshiniń ózine ornatylǵan eskertkishteı asqaqtaıtyny shúbásiz.
Tabıǵat ZEINULQABDEN,
Astana qalasy máslıhatynyń tóraǵasy
