Basqosýda elimizdiń densaýlyq saqtaý júıesindegi ózekti máseleler ortaǵa tastaldy. Eki kúnge jalǵasatyn forýmǵa 300-den astam adam qatysty. Olardyń qatarynda halyqaralyq jáne otandyq jetekshi sarapshylar, medısınalyq uıymdardyń basshylary, Eýropalyq densaýlyq saqtaý menedjerleri qaýymdastyǵynyń (EHMA) Prezıdenti, medısına ǵylymdarynyń doktory (MD), Ispanııadaǵy CASAP (Consorci Castelldefels Agents de Salut) uıymynyń basshysy Antonı Perıs, DDSU Eýropalyq alǵashqy medısınalyq-sanıtarlyq kómek ortalyǵynyń jetekshisi Melıtta Iаkob, Parlament Májilisiniń depýtaty Ashat Aımaǵambetov, Densaýlyq saqtaý birinshi vıse-mınıstri Tımýr Sultanǵazıevtar boldy.
Forým barysynda densaýlyq saqtaý júıesin damytýdyń negizgi baǵyttary qarastyryldy. Alǵashqy medısınalyq-sanıtarlyq kómekke qatysty máseleler talqylandy. Salanyń sıfrlyq transformasııasyna nazar aýdaryldy. Onyń ishinde ınnovasııalardy engizý, derekterdi paıdalaný jáne jasandy ıntellektti qoldaný máseleleri talqylandy. Forýmǵa qatysýshylar densaýlyq saqtaýdy basqarýda adamı kapıtaldy damytý, medısınalyq kómektiń sapasyn arttyrý jáne pasıentterdiń qaýipsizdigin qamtamasyz etý, sondaı-aq alǵashqy medısınalyq-sanıtarlyq kómekti qarjylandyrý tetikterin qarastyrdy.
Forýmnyń ashylýynda Qazaqstandyq densaýlyq saqtaý menedjerleri qaýymdastyǵynyń tóraǵasy ári negizin qalaýshysy Qýanysh Erǵalıev bylaı dedi:
«Prezıdent Qasym-Jomart Toqaev Joldaýda atap ótkendeı, jasandy ıntellekt pen sıfrlyq transformasııa – densaýlyq saqtaý bolashaǵynyń ajyramas bóligi. JI engizý arqyly dıagnostıka, taldaý, sheshim qabyldaýda jańa múmkindikter týady. Eń bastysy – medısınalyq kómekti qoljetimdi etedi. Alaıda, biz túsingenimizdeı, tehnologııa adamdy almastyrmaıdy. Ol onyń áleýetin kúsheıtedi. Sondyqtan densaýlyq saqtaý menedjerleriniń quzyretteri asa mańyzdy bola túsýde. Beıimdele bilý, jedel sheshim qabyldaý, ózgeristerdi aldyn ala boljaı bilý, komandalardy basqarý – munyń bári ornyqty júıeniń berik negizin qalaıdy», dedi Qýanysh Erǵalıv.
Izinshe, DDU-nyń Eýropalyq alǵashqy medısınalyq-sanıtarlyq kómek ortalyǵynyń basshysy Melıtta Iаkob alǵashqy medısınalyq-sanıtarlyq kómekti damytýǵa ınvestısııa salýdyń qajettigin atap ótti. Ol medısınadaǵy teńsizdikti joıý úshin sıfrlyq quraldar men jasandy ıntellektini qoldanýdyń, kómek kórsetýdiń, kadrlyq áleýetti nyǵaıtýdyń jáne densaýlyq saqtaýdy basqarýǵa qaýymdastyqtardyń qatysýyn keńeıtýdiń mańyzyn aıtty. Sol sekildi Eýropalyq densaýlyq saqtaý menedjerleri qaýymdastyǵynyń (EHMA) Prezıdenti, doktor Antonı Perıs densaýlyq saqtaý júıeleriniń negizgi syn-qaterlerin atap ótti. Onyń ishinde halyqtyń qartaıýy, kadr tapshylyǵy, áleýmettik suranystardyń ósýi jáne psıhıkalyq densaýlyq máseleleriniń kóbeıýi syndy tarmaqtar bar.
