Nıý-Iorktegi konsert 2022 jyly Almatyda bastalǵan úlken týrdyń bir bóligine aınalǵanymen de erekshelendi. «Bul meniń jeke juldyzdy sátim ǵana emes, búkil Eýrazııalyq mádenıet úshin mańyzdy kezeń. Biz planetanyń arǵy jaǵyndaǵy mádenı elshiler retinde áreket etemiz», depti Dımash jergilikti baspasózge bergen suhbatynda.
Konsertte qazaq ánderimen qatar, álemge tanymal kompozısııalar oryndaldy. Stranger áninde qazaq qobyzy men Haýzerdiń vıolonchel partııasy qulaqqa urdy. Bul shyǵarma alǵash ret 2022 jyldyń qyrkúıeginde Almatyda ótken «Stranger» týrynyń ashylý konsertinde shyrqalyp, Dımashtyń turaqty repertýaryna engen.
Budan keıin ánshi konsertin Meksıkada jalǵastyrdy. Latyn Amerıkasyndaǵy tuńǵysh keshinde – Mehıko qalasynyń áıgili konsert zaly «Auditorio Nacional» sahnasynda bos oryn bolǵan joq.
Konsert bastalmaı jatyp zal dálizderinde meksıkalyq tyńdarmandar Dımash esimin uran etip, keremet kóńil kúıde kútip aldy. Ánshi sahnaǵa «jalyndy» beınede shyǵyp, shoý «Golden» jáne «Smoke» ánderimen bastaldy. Tolassyz qoshemetten keıin ol qazaq, aǵylshyn jáne ıspan tilderinde jyly sálem joldady:
«Qaıyrly kesh, Meksıka! Sizderdiń aldaryńyzda óner kórsetý – men úshin arman bolatyn. Sizderdiń sheksiz súıispenshilikterińiz ben energııalaryńyz úshin alǵysym sheksiz. Sizder meni óz úıimde júrgendeı sezindirdińizder. Búgingi keshte árbirińiz sıqyrǵa toly jumbaq sezimge bólenetin bolasyzdar», dedi.
Kórermender árbir án saıyn áserge bólendi dese bolǵandaı. Dımash bul keshte de erekshe shabytqa endi. Ol kórermenge jıi qol bulǵap, alǵys bildirip otyrdy. Konsert barysynda zaldy ánshi daýsynyń qudireti kernep, jurt Dımashtyń ár qımylyn qaıtalap ketkeni baıqalady. «Give Me Your Love», «Be With Me», «Taý Ishinde», «Weekend», «Living For The Game» ánderin oryndaǵanda kórermender birge bılep, «Umytylmas Kún», «Fire», «When I’ve Got You» sııaqty kúrdeli shyǵarmalardy ánshimen birge shyrqady.
Al qazaqtyń ulttyq aspaptary – dombyra, sybyzǵy jáne qobyz úni «Adaı», «Dúrdaraz», «Stranger» jáne jańa týyndysy «Samǵaý» kompozısııalarynda erekshe úılese ketti.
Konsert sońynda Dımash kórermenderine júrekjardy alǵysyn bildirdi.
