- 14-21 qazan aralyǵynda Semeıde bokstan erler men áıelder arasynda Qazaqstan chempıonaty ótedi. Atalǵan jarysta respýblıkamyzdyń barlyq óńirinen kelgen 370-ten asa bylǵary qolǵap sheberi kúsh synasady. Qatysýshylar World Boxing uıymy bekitken salmaq dárejeleri boıynsha óner kórsetedi. Bul básekeden tek bıyl Lıverpýlde uıymdastyrylǵan álem chempıonatynan oljaly oralǵan oǵylandar ǵana bosatyldy.
- Qazaqstannyń birinshi raketkasy Elena Rybakına Qytaıdyń Ýhan qalasynda ótip jatqan WTA týrnıriniń 1/8 fınalynda chehııalyq Lında Noskovadan 6:3, 6:4 esebimen basym tústi. Endi ol álemdik reıtıngtiń kóshbasynda turǵan Belarýs tennısshisi Arına Sobolenkomen sheberlik baıqasady.
- Basketboldan bıylǵy el chempıonatynda bes komanda ǵana baq synaıdy. Olar – «Almatynyń legıony», «Astana», «Tobyl», «Kaspıı» jáne «Atyraýdyń barysy». Al qalǵan klýbtar qarajat tapshylyǵy saldarynan jarysqa qatysýdan bas tartty. Solardyń qatarynda 2023–2024 jylǵy maýsymnyń jeńimpazy – Almatynyń «Irbıs–Alataýy» da bar.
- Qurlyqtyq hokkeı lıgasynda (QHL) óner kórsetip júrgen «Barys» Chelıabige sapar shegip, jergilikti «Traktormen» kezdesti. Báseke barysynda aıdyn ıeleri arasynan Andreı Svetlakov pen Aleksandr Kadeıkın nysanany dál kózdese, qonaqtardyń sapynan Maksım Muhametov pen Semıon Sımonov mergendik tanytty. Qosymsha ýaqyt teń aıaqtalyp, oıyn overtaımǵa ulasty. Bul rette «Traktordyń» joly boldy. Esep – 3:2.
- Sý dobynan Úndistanda ótip jatqan Azııa chempıonaty naǵyz qyzǵan shaǵyna jetti. Vaterpoldan elimizdiń áıelder quramasy shırek fınalda Sıngapýrdy (10:7) san soqtyrsa, erler О́zbekstannyń (27:11) tas-talqanyn shyǵardy. Endi jartylaı fınalda Qazaqstannyń qos komandasy da Qytaı quramasymen kezdesedi.
