Qazaqstan Respýblıkasy Mádenıet jáne aqparat mınıstrliginiń qoldaýymen ótken eki kúndik óner básekesinde elimizdiń túkpir-túkpirinen kelgen 23 úmitker baq synap, olardyń arasynan segiz fınalıst ekinshi kezeńge ótken bolatyn.
Gala-konsert shymyldyǵy N.Tilendıev atyndaǵy «Otyrar sazy» akademııalyq folklorly-etnografııalyq orkestriniń oryndaýyndaǵy «Meniń babam Qarasaı» kúıimen ashyldy. Konkýrs barysynda qazylar alqasynyń talqylaýynan keıin erekshe oqıǵa oryn alǵan bolatyn. Joǵary baǵaǵa ıe bolǵan kásibı dırıjerlar Mádı О́mirzaqov pen Qýanysh Ismaılov izgilik tanytyp, ini-qaryndastaryna jol berdi. Bul qadamǵa rıza bolǵan qazylar alqasynyń músheleri E.Rahmadıev atyndaǵy Memlekettik akademııalyq fılarmonııasy Sımfonııalyq orkestriniń kórkemdik jetekshisi, «Astana Opera» memlekettik opera jáne balet teatrynyń dırıjeri, Qazaqstannyń halyq ártisi Abzal Mýhıtdınov pen Qyzylorda oblystyq sımfonııalyq orkestriniń kórkemdik jetekshisi jáne bas dırıjeri, Qazaqstannyń eńbek sińirgen qaıratkeri Músilim Baltabaıuly Ámze qos dırıjerǵa Astana qalasy ákimdiginiń E.Rahmadıev atyndaǵy memlekettik akademııalyq fılarmonııasynyń Sımfonııalyq jáne Qazaq orkestrlerimen birlesip jeke konsert ótkizýge arnaıy joldama usyndy.
Marapattaý rásimi odan ári jalǵasyp, Arshat Shárip, Dáýrenbek Súıindik úzdik ónerleri úshin arnaıy dıplomdarmen jáne 200 000 teńge sertıfıkattarmen marapattalsa, astanalyq Dına Ardaq «N. Tilendıevtiń shyǵarmalaryn úzdik oryndaǵany úshin» nomınasııasyn jeńip aldy. Qazylar alqasynyń músheleri E.Rahmadıev atyndaǵy Memlekettik akademııalyq fılarmonııasy Qazaq orkestriniń kórkemdik jetekshisi jáne bas dırıjeri, Qazaqstannyń eńbek sińirgen qaıratkeri, «Parasat» ordeniniń kavaleri, professor Aıtqalı Jaıymov pen baýyrlas Qyrǵyz elinen kelgen Bishkek qalasy ákimdigi mádenıet basqarmasynyń halyq aspaptar orkestriniń bas dırıjeri, Qyrǵyzstan Respýblıkasynyń halyq ártisi Bakytbek Tılegenov III oryn ıegerleri Qabyl Arnat, Ǵabıtov Dáýlet jáne Raqyshev Abaıdy 400 000 teńgeniń sertıfıkaty jáne arnaıy dıplommen marapattady. Al qazylar alqasynyń tóraǵasy N. Tilendıev atyndaǵy akademııalyq folklorly- etnografııalyq «Otyrar sazy» orkestriniń kórkemdik jetekshisi jáne bas dırıjeri, Qazaqstannyń eńbek sińirgen qaıratkeri, «Parasat», «Qurmet» ordenderiniń kavaleri Dinzýhra Tilendıeva II oryn tuǵyrynan kóringen Álı Saparbekti 600 000 teńge sertıfıkat jáne arnaıy dıplommen marapattady. Konkýrstyń eń basty júldesi Nurǵalı Áshimhanǵa buıyryp, oǵan I oryn dıplomyn jáne 1 000 000 teńge sertıfıkatty Qazaqstan Respýblıkasy Mádenıet jáne aqparat vıse-mınıstri Aıbek Sydyqov saltanatty túrde tabystady. Erekshe aıta ketetin jaıt, konkýrsqa qatysqan barlyq úmitkerler Qazaqstan Respýblıkasy Mádenıet jáne aqparat mınıstri Aıda Balaevanyń Alǵys hatymen marapattaldy.
Gala-konsertte jeńimpazdar men laýreattar óz ónerlerin kórsetip, jeńimpaz atanǵan Nurǵalı Áshimhan N.Tilendıevtiń «Altyn dán» shyǵarmasyna dırıjerlyq etti. Kesh sońynda orkestrdiń kórkemdik jetekshisi Dinzýhra Tilendıeva N.Tilendıevtiń «Mahambet» kúıine dırıjerlyq etip, fınalda áıgili «Qustar ánin» búkil zal birge shyrqap, uly kompozıtordyń rýhyna qurmet kórsetildi. Konsert sońynda ónerpazdarǵa QR Mádenıet jáne aqparat mınıstrliginiń yqylas gúli tabystaldy.
