Kólikti osydan bir jyl buryn ǵana qolǵa túsirgen Nurpeıis Qonysbaıdyń aıtýynsha, eskiniń kózi qazir jóndeýde. Qozǵaltqysh kúshin arttyryp, ony-munysyn retke keltirý ústinde eken. Negizi júrip kelip toqtaǵan. Biraq burynǵy qozǵaltqysh kúshi sál báseńirek, osy kúnniń údesinen shyǵa bermeıtin bolǵandyqtan, eptep arttyryp, jetildirip jatqan beti. Onyń ózinde bóten kóliktiń emes, sál jetildirilgen «Moskvıchtiń» motoryn aýystyryp salady. Sóıtken soń keler jyly osyndaı eski kólikterdiń jarysy – retro-rallıge qosylmaqshy. Ondaı jarystar Mońǵolııada jıi ótedi desedi.
Eski de jańa kóliktiń ázirge olqy tusy joq. Zamanaýı temir tulparlarmen aýlaǵa qatar qoısa, árıne, el áýeli osymen sýretke túsýge tyrysady.
«Anamnyń aıtýynsha, men týǵanda aýylda jalǵyz «Moskvıch» bar eken de, ákem perzenthanaǵa sonymen kelgen ǵoı. Alǵash mingen kóligim esebinde osy áńgime qulaǵymda qalypty. Múmkin qyzyǵýshylyq sodan týǵan shyǵar. Bulardyń túp-tórkinin zerttep júrip, «Moskvıchtiń» atasy nemisterdiń «Opeli» ekenin bildim. Ekinshi dúnıejúzilik soǵys aıaqtalǵan soń, jeńilgen eldiń aıyp-shamynyń óteýi retinde orys jerine tórkindegen eken. Atalarymyz qyzyǵyn kórip baqty ǵoı bulardyń», deıdi kólik ıesi N.Qonysbaı.
