Oralda «Qazaqstanda jasalǵan» aksııasy bastaldy

ORAL. 19 aqpan. Oral qalasynda «Qazaqstanda jasalǵan» aksııasy bastaldy. Soǵan baılanysty qaladaǵy iri sýpermarketterde otandyq óndiris oryndarynda jasalǵan azyq-túlik taýarlary arnaıy ázirlengen sórelerge qoıyldy. Bul týraly egemen.kz habarlady. «Biz bul bastamany birden qoldadyq. Soǵan saı sýpermarketterde óz elimizde óndirilgen taýar túrlerin aıryqshalap ereksheleıtin arnaıy tórt buryshty taqtalar ornatyldy. Osy arqyly tutynýshylardyń Qazaqstanda jasalǵan azyq-túlik túrlerine kózderi birden túsedi», – deıdi sýpermarketter júıesiniń dırektory Galına Kojına. Qazirgi tańda oblys ortalyǵynda bastalǵan bul bastama 8 sýpermarket pen 4 azyq-túlik bazarynyń jetekshileri tarapynan birden qoldaý tapty. Aksııa talaptaryna sáıkes qazaqstandyq taýarlar sýpermarketterdiń eń kórnekti ári eń yńǵaıly oryndaryna ornalastyrylǵan. Munyń ózi onyń kóbirek satylyp alynýyna múmkindik beredi. Aksııanyń alǵashqy kúnderiniń ózinde tutynýshylardyń qazaqstandyq taýarlarǵa degen qyzyǵýshylyǵy baıqalǵanyn biz atalǵan sýpermarketterge bas suqqan kezde aıqyn ańǵardyq. Osy turǵyda qala turǵyny, taýar satyp alýshy Násip Tóleýishqyzy óz tilegin bylaısha jetkizdi: «Men qazaqstandyq óndirisshiler azyq-túliktiń dál osyndaı kóptegen túrlerin óndiredi dep oılamappyn. Qatelesken ekenmin. Tipti, ony satyp almaǵanymyzben, qazaqstandyq taýarlarmen tanysýdyń ózi otanshyldyq sezimdi tereńdetedi eken. Buǵan deıin bir ǵana «Kýbleı» fırmasy shyǵarǵan et, balyq, kókónis qalbyrlaryn ǵana bilsek, endi qazaqstandyq azyq-túlik taýarlary túrleriniń biz oılaǵannan áldeqaıda kóp ekenine kóz jetkizip otyrmyz». Sonymen birge, aldymyzdaǵy senbide Oral qalasyndaǵy «El yrysy» atty kommýnaldyq kóterme saýda bazary jetekshileri de qazaqstandyq óndiris oryndarynda óndirilgen ónimderdi jeńildetilgen baǵamen tutynýshylarǵa usynbaq. Temir Qusaıyn. Derek: egemen.kz. Sýret: uralskweek.kz.