Bul ınnovasııa Prezıdent Qasym-Jomart Toqaev aıqyndaǵan sıfrlandyrý baǵytyna jasalǵan naqty qadam boldy. Memleket basshysy jasandy ıntellekt «qýatty, ádiletti jáne qaýipsiz Qazaqstan qurý úshin keremet múmkindik ashatynyn» atap ótti. «Qazaqmys» kompanııasy bul sózdiń naqty óndiristik úderiste júzege asyp jatqanyn óz úlgisinde kórsetip otyr. Tashkentte ótken «Micromine» paıdalanýshylarynyń VIII Ortalyq Azııa konferensııasynda kompanııa mamandary qoldanysqa engizilgen júıeniń alǵashqy jetistigi týraly aıtyp berdi.
Geologııalyq barlaý departamentiniń dırektory Bekasyl Aýkeshev «Weir Group Digital»-dıvızıonynyń prezıdenti Krısten Ýolshpen (Ulybrıtanııa) jáne halyqaralyq satý jetekshisi Greg Sleıtermen (AQSh) kelissóz júrgizdi. Qatysýshylar baǵdarlamalyq sheshimderdi damytý, JI quraldaryn qoldaný jáne otandyq mamandardyń biliktiligin arttyrý máselesin talqylady. Qazir kompanııada geologııalyq derekterdi, onyń ishinde ótken jyldardyń muraǵattyq materıaldaryn sıfrlandyrý júrip jatyr. Geoaqparatty saqtaýdyń biryńǵaı korporatıvtik standarty qurylýda. Al «Micromine» baǵdarlamalyq ónimderi barlaýdan bastap óndirýdi josparlaýǵa deıingi barlyq kezeńde qoldanady.
«Qazaqmys» jyl sońyna deıin «Micromine Advance» jáne «Alastri» jańa modýlderin engizýdi josparlaıdy. Bul óndiristik úderisterdiń tolyq sıfrlyq ıntegrasııasyna qol jetkizýge múmkindik beredi.
Konferensııada geolog Jan Shomytov Jaman-Aıbat ken orny boıynsha júrgizgen zertteýin tanystyrdy. «Micromine» baǵdarlamasynyń kómegimen mamandar mystyń mıneraldanýy men tektonıkalyq buzylystar arasyndaǵy baılanysty anyqtap, geologııalyq qurylymdardy taldaýda JI qoldaný tıimdi ekenin rastady.
Búginde «Qazaqmysta» «Micromine» baǵdarlamasyn 400-den astam maman qoldanady. 300-ge jýyq lısenzııa men
1 400-den astam modýl bar. Derekterdiń 90%-dan astamy sıfrlyq formatqa kóshirildi. 500-den astam maman oqytýdan ótti. Olardyń basym bóligi halyqaralyq sertıfıkatqa ıe boldy. Osy qadamdardyń arqasynda korporasııa elimizdegi taý-ken óndirisi salasyn sıfrlandyrý baǵytyndaǵy kóshbasshylyǵyn nyǵaıtyp, Memleket basshysy alǵa qoıǵan – jasandy ıntellekt pen sıfrlyq tehnologııalardy ónerkásipte damytý mindetin júzege asyryp jatyr.
