Etnojýrnalıstıka – kelisim kepili

Etnosaralyq kelisim taqyry­byn jarııalaıtyn medıa maman­dardyń kásibı mashyǵyn jetildirýge baǵyt­tal­ǵan jobaǵa el aımaqtarynan 30-ǵa jýyq BAQ ókili arnaıy shaqyrylǵan. Olardyń qatarynda óńirlik basylymdardyń bas redaktorlary men jýrnalıster, memlekettik uıymdardyń baspasóz hatshylary bar. Kezdesýde mamandar ózara tájirıbe almasyp, etnosaralyq qatynastarǵa qatysty názik taqyryptarmen jumys isteý daǵdylaryn damytý, buqaralyq aqparat quraldarynda etnosaıası ter­mınologııany durys qoldaný syndy etnojýrnalıstıkanyń ózekti máselelerin saralady.

«Bıyl klýbymyz 70-ten asa is-shara uıymdastyrýdy josparlaǵan edi. Kezekti basqosý – sonyń aýqymdylarynyń biri. Qyrkúıek aıynda Astanada bir aptalyq oqý uıymdastyrdyq. Etnostyq buqa­ralyq aqparat quraldarynyń máni, onyń jumys jaǵdaıy búgin­gi forýmǵa ózek bolyp otyr. Prezı­dent óńirlerdegi Jýrnalıster klýbtarynyń jumysyn jetildirý men jolǵa qoıýdy tapsyrǵan edi. Qoǵamdyq turaqtylyq pen ózara syılastyq memleket ómirindegi – basty qundylyqtardyń biri. Bul jolda buqaralyq aqparat quraldarynyń róli erekshe. BAQ ókilderi el ishindegi tatýlyqty nasıhattap, etnosaralyq kelisimdi nyǵaıtýda dáneker qyzmetin atqarady. Ár maqala men sıýjet – beıbitshilik pen birliktiń úndeýshisi. Sondyqtan jýrnalısterdiń jaýap­ker­shiligi zor. Aqparatty taratýda ádildik pen parasattylyq tanytý – qoǵamdyq kelisimniń kepili», deıdi QHA Jýrnalıster klýbynyń tóraǵasy, Senat depýtaty Álisher Satvaldıev.

Etnojýrnalıstıka salasyndaǵy basym baǵyttar saralanǵan jobaǵa elimizdegi «Bas redaktorlar klýby» da ún qosqan. Basqosýda sóz alǵan «Bas redaktorlar klýby» qoǵamdyq birlestiginiń jetekshisi Bıbigúl Jeksenbaı, qazirgi áleýmettik jeli kúsheıgen kezeńde kásibı jýrnalıstıkaǵa úlken belsendilik keregin, jýrnalıst tek tilshi retinde emes, sarapshy deńgeıinde pikir aıta alatyn maman bolýy qajettigine toqtaldy.

«Dál qazirgi ýaqytta BAQ-tyń róli erekshe. Qazir aqparattyq qaýipsizdik máselesi óte mańyzdy mánge ıe. Bul turǵyda jańalyqty buqaraǵa durys jetkizý, el birligine áser etetin názik máselelerge qalam terbegende asqan uqyptylyqpen, paıym-parasatpen iske kirisken jón. Kórshi eldermen baılanysymyz da, ishki berik tatýlyǵymyz da eń aldymen osy aqparattan bas­talady. Qoǵamdaǵy turaqtylyq pen birlik qundylyqtaryn nasıhattaý etnojýrnalıstıkaǵa úlken jaýapkershilik júkteıdi», deıdi B.Jeksenbaı.

Is-sharada Ál-Farabı atyndaǵy Qazaq ulttyq ýnıversıteti Jýrna­lıstıka fakýltetiniń dekany Qanat Áýesbaı fakýltette úsh jyldan beri etnojýrnalıstıka pán retinde oqytylyp kele jatqanyn, kásibı jýrnalısterdi daıarlaýda qoǵamdyq kelisim taqy­ryby udaıy nazarǵa alynatynyn atap ótti.

Al «Medıakeńistikte etnosaıası termınologııany qoldaný erekshelikteri» taqyrybynda dáris oqyǵan MAM EQDK Ádisteme­lik qamtamasyz etý jáne aqparattyq-túsindirý jumysyn uıymdastyrý basqarmasynyń bas sarapshysy Raıhan Tileýbergenova el azamattarynyń 30 paıyzyn etnos ókilderi quraıtynyn, etnostyq toptar arasyndaǵy syndarly dıalogti damytý BAQ-taǵy saýatty materıal­darmen tyǵyz baılanysty ekenin tilge tıek etti.

Is-shara sheńberinde antı­krı­zıstik PR men medıakommýnıkasııa baǵytynda tájirıbelik trenıng­ter ótip, etnojýrnalıstka damýyndaǵy zamanaýı úrdister talqy­landy. Sondaı-aq QHA Jýrna­lıster klýby men Bas redaktorlar klýby yntymaqtastyq týraly memorandýmǵa qol qoıdy.

ALMATY