Sýretti túsirgender – A.Dúısenbaev, E.ÚKIBAEV
Memleket basshysy eń aldymen «Lýkoıl» kompanııasynyń Qazaqstandaǵy qyzmetine 30 jyl tolýymen quttyqtady.
– «Lýkoıl» – elimizde tabysty jumys istep jatqan bedeldi kompanııanyń biri. 1995 jyly Qazaqstanǵa alǵash qadam basqan kompanııanyń elimizdegi abyroı-bedeli zor dep aıtýǵa tolyq negiz bar. Bul – tabandy eńbek pen tereń jaýapkershiliktiń arqasy ekeni sózsiz. Budan bólek, «Lýkoıl» kompanııasy Qazaqstan men Reseı arasyndaǵy seriktestikti nyǵaıta túsýge mol úles qosyp jatyr. Kásiporyn elderimizdiń ekonomıkalyq áleýetin nyǵaıtyp, yrysty yntymaǵymyzdy arttyryp otyr. Tarıhqa úńilsek, «Lýkoıl» kompanııasynyń qazaq jerindegi qyzmeti «Qumkól» jobasynan bastaý aldy. Kásiporyn jemisti jumys istep, shırek ǵasyrdan asa ýaqyt ishinde orasan zor tabysqa qol jetkizdi. Atap aıtqanda, «Lýkoıl» Qazaqstannyń munaı-gaz salasyna 12 mlrd dollardan asa qarjy saldy, 94 mln tonna munaı jáne 60 mlrd tekshe metr gaz óndirdi. Kompanııa 300 mln dollarǵa jýyq qarjyny áleýmettik jobalar men qaıyrymdylyqqa jumsaǵan, – dedi Qasym-Jomart Toqaev.
Prezıdent bul kórsetkishterdiń aıasynda myńdaǵan jumys orny qurylyp, ozyq tehnologııalar kelgenin, óńirlerdiń áleýmettik-ekonomıkalyq damýyna úlken úles qosylǵanyn atap ótti. Kompanııanyń qatysýymen Teńiz ken ornyndaǵy Keńeıtýdiń bolashaǵy jobasy tabysty aıaqtaldy. Bul álemdik munaı-gaz salasyndaǵy iri bastamalardyń biri sanalady.
– Kaspıı qaırańynda «Lýkoıl» «QazMunaıGaz» kompanııasymen birlese «Qalamqas teńiz» jáne «Hazar» sekildi perspektıvti jobalardy júzege asyrýǵa kiristi. Bul – strategııalyq jobalar. Ken oryndaryn ıgerý úshin 6 mlrd dollardan asa tikeleı ınvestısııa quıý jáne 2 myńnan asa jańa jumys ornyn ashý kózdelgen. Atalǵan jobadaǵy qazaqstandyq úlesti arttyrý maqsatynda teńiz munaıyn óndirý platformasyna Mańǵystaý oblysynyń keme jasaý jáne jóndeý óndirisi tartylǵan. Kásiporyn Qarashyǵanaq ken ornynda jumysyn jemisti jalǵastyryp keledi. Sonymen qatar qazirgi tańda «Lýkoıl» Kaspıı qubyr konsorsıýmyn damytýǵa atsalysýda. Munyń da elimiz úshin mańyzy erekshe. Osy strategııalyq máni zor baǵdar arqyly Qazaqstan munaıy ondaǵan memleketke jetkizilip jatyr. Sol arqyly elimizdiń jahandyq energetıka naryǵyndaǵy róli nyǵaıyp keledi, – dedi Qasym-Jomart Toqaev.
Memleket basshysy 2019 jyly Almaty oblysynda jaǵarmaı zaýytynyń iske qosylýyn yntymaqtastyq tarıhyndaǵy eń mańyzdy kezeń retinde atady. Bul – elimizdegi joǵary halyqaralyq standarttarǵa saı keletin jaǵarmaı óndiretin alǵashqy kásiporyn.
– Korporasııanyń áleýmettik jaýapkershilik tanytýdaǵy joǵary deńgeıi men qaıyrymdylyq salasyndaǵy qoldaýyn erekshe atap ótkim keledi. Kompanııanyń adam kapıtalyn damytýǵa aıryqsha kóńil bóletini qýantady. Iri munaı-gaz nysandarynda eńbek etetin myńdaǵan qazaqstandyqtar jańa bilim alyp, biliktiligin jetildirip, zamanaýı tehnologııalardy ıgerdi. Olardyń kásibı sheberligi, eńbeksúıgishtigi, óz isine adaldyǵy – Qazaqstannyń maqtanyshy ári keleshek tabystarymyzdyń kepili. Bir sózben aıtqanda, otyz jyl ishinde Qazaqstan men «Lýkoıl» syndarly yntymaqtastyq jolynan súrinbeı ótti, – dedi Prezıdent.
Qasym-Jomart Toqaev munaı-gaz sektory Qazaqstan ekonomıkasynda úlken ról atqaratynyn jetkizdi. Alda qoldanystaǵy ken oryndaryn odan ári ıgerý mindeti tur.
– Sonymen qatar aýqymdy geologııalyq barlaý, shıkizatty tereń óńdeý jobalaryn iske qosý, sıfrlandyrý jáne jasandy ıntellekt tehnologııalaryn engizý, sondaı-aq adamǵa, áleýmettik salaǵa ınvestısııa quıý jumystarynyń mańyzy zor. «Lýkoıl» kompanııasy bul basymdyqtardy tolyq qoldaıtynyna, bolashaqta strategııalyq yntymaqtastyqty damytýda jańa tabystarǵa qol jetkizetinimizge senimdimin. Elimizdiń órkendeýine úles qosyp júrgen kompanııanyń barlyq qyzmetkerine alǵys aıtamyn, – dedi Memleket basshysy.
Qasym-Jomart Toqaev Qazaqstannyń energetıkalyq áleýetin damytýǵa qosqan zor úlesi úshin belgili kásipker jáne qoǵam qaıratkeri Vagıt Alekperovti I dárejeli «Barys» ordenimen marapattady.
Sondaı-aq «Lýkoıl» kompanııasynyń Qazaqstanda jumys isteıtin birqatar qyzmetkeri memlekettik nagradaǵa ıe boldy.
