Sýretti túsirgen – Igor BÝRGANDINOV
Forým aıasynda Qoǵamdyq keńesterdiń IV Respýblıkalyq májilisi ótti. Oǵan Mádenıet jáne aqparat mınıstri Aıda Balaeva, óńirlik jáne respýblıkalyq qoǵamdyq keńesterdiń músheleri, sarapshylar, halyqaralyq seriktester men azamattyq sektor ókilderi qatysty.
Jıynda mınıstr qoǵamdyq ınstıtýttar turaqty damyp, olardyń róli artyp kele jatqanyn atap ótti.
– Qoǵamdyq keńesterdiń tıimdi jumysy kóbine sizderdiń belsendi ustanymdaryńyz ben bastamashyldyqtaryńyzǵa baılanysty. Bul alańda sizder Ulttyq quryltaı músheleri sııaqty jergilikti deńgeıde kóterilgen ózekti máseleler men usynystardy talqylaýǵa bastamashy bola alasyzdar. Bul – azamattardyń pikirin respýblıkalyq deńgeıge jetkizýdiń tıimdi joly, – dedi A.Balaeva.
Mınıstr halyqpen keri baılanysty nyǵaıtý jáne qoǵamdyq keńester ınstıtýtyn zamanaýı úrdisterge saı jetildirý qajettigin aıtty. Osy maqsatta ol keńesterdiń jumysynda sıfrlyq tehnologııalar men jasandy ıntellekt múmkindikterin keńinen qoldanýdy usyndy. Sonymen qatar A.Balaeva qoǵamdyq keńesterdiń parlamenttik reformalarǵa belsendi qatysýynyń mańyzdylyǵyn erekshe atap ótti.
– Prezıdent atap ótkendeı, bul másele qoǵamnyń keńinen qatysýyn, halyq pikirin jan-jaqty taldaý men zerdeleýdi qajet etedi. Sondyqtan qoǵamdyq keńesterdiń Konstıtýsııa baptaryna tolyqtyrýlar men ózgerister engizý jónindegi usynystardy ázirleý úderisine tikeleı aralasýy mańyzdy dep sanaımyn, – dedi mınıstr.
A.Balaeva qoǵamdyq keńesterdiń jumys tıimdiligin arttyrý jáne qoǵamdyq baqylaýdy kúsheıtý maqsatynda keńesterdiń halyq aldynda ashyq esep berý tájirıbesin engizýdi usyndy. Onyń aıtýynsha, «Qoǵamdyq keńester týraly» zańda bekitilgen ashyqtyq pen aıqyndyq qaǵıdattary tek qaǵaz júzinde emes, is júzinde júzege asýǵa tıis.
Sondaı-aq mınıstr qoǵamdyq baqylaýdyń tek jekelegen máselelermen shektelmeýine de nazar aýdarý qajetin atap ótti. Onyń pikirinshe, bul baǵyt Prezıdenttiń bastamalary men ulttyq jobalarynyń («Zań jáne tártip», «Taza Qazaqstan», «Adal azamat», t.b.) iske asyrylýyn júıeli túrde monıtorıngteý men ilgeriletýge baǵyttalýǵa tıis. Bul jumysqa qoǵam ókilderin keńinen tartý qajet.
Qazir elimizde 263 qoǵamdyq keńes quramynda 4 myńnan asa belsendi azamat eńbek etip jatyr. Keıingi úsh jylda olar azamattardyń quqyqtary men bostandyqtaryna qatysty 9 myńnan asa normatıvtik-quqyqtyq aktiler jobasyn qarastyrǵan. Sondaı-aq 2 100 memlekettik organ basshysynyń esepteri tyńdalyp, 820 qoǵamdyq tyńdaý uıymdastyrylǵan. Buǵan qosa áleýmettik qorǵaý, jer qatynastary, densaýlyq saqtaý jáne basqa da máseleler boıynsha 2 myńnan asa azamattyń ótinishteri qaralǵan.
Májilis qorytyndysy boıynsha qoǵamdyq keńester qyzmetiniń quqyqtyq jáne uıymdastyrýshylyq negizderin jetildirýge baǵyttalǵan usynystar ázirlenedi. Bul sheshimder aldaǵy ýaqytta ýákiletti memlekettik organdardyń jumysynda eskerilip, odan ári reformalarǵa da negiz bolmaq.
Al «Azamattyq forým: usynystardan nátıjege» paneldik sessııasynda sarapshylar elimizdegi 2020–2030 jyldarǵa arnalǵan Azamattyq qoǵamdy damytý tujyrymdamasyn iske asyrýdyń birinshi kezeńiniń qorytyndylaryn shyǵaryp, X jáne XI Azamattyq forýmdarda usynylǵan usynystardyń qanshalyqty júzege asqanyn talqylady.
Bıyl 2020 jyly 27 tamyzdaǵy Prezıdent Jarlyǵymen bekitilgen tujyrymdamany iske asyrýdyń birinshi kezeńi aıaqtalady. Jumys azamattyq qoǵamdy damytýdyń jekelegen qyrlaryn qamtıtyn bes negizgi baǵyt boıynsha júrgizilgen.
Azamattyq ister komıtetiniń tóraǵasy Gúlbara Sultanovanyń aıtýynsha, 2020–2025 jyldardyń qorytyndysy boıynsha Tujyrymdamany iske asyrýdyń birinshi kezeńi tabysty iske asqan.
– Qazaqstan 2020–2025 jyldary azamattyq qoǵam ınstıtýttaryn damytýda aıtarlyqtaı ilgeri qadam jasady. Birinshiden, úkimettik emes uıymdar men azamattyq bastamalardyń qyzmetine arnalǵan zańnamalyq baza nyǵaıtyldy. Ekinshiden, azamattyq belsendilikti, volonterlikti jáne qaıyrymdylyqty qoldaý sharalary iske asyryldy. Úshinshiden, onlaın-petısııalar men jańartylǵan qoǵamdyq keńesterden bastap Ulttyq quryltaıǵa jáne keri baılanystyń basqa da nysandaryna deıin azamattar men ÚEU-nyń sheshim qabyldaýǵa qatysýynyń jańa tetikteri engizildi. Sondaı-aq memlekettik áleýmettik tapsyrys pen granttar arqyly aýqymdy qarjylandyrý, kadrlardy daıarlaý, ÚEU-lardyń kásibıligi men turaqtylyǵyn arttyrý sektordy edáýir nyǵaıtýǵa múmkindik berdi, – dedi komıtet tóraǵasy.
Onyń aıtýynsha, tujyrymdamanyń ekinshi kezeńi qol jetkizilgen sandyq nátıjelerdi memleket pen qoǵam arasyndaǵy sapaly ózara is-qımylǵa aınaldyrýǵa, azamattyq sektordy memlekettiń tolyqqandy ári teń quqyqty seriktesi retinde odan ári nyǵaıtýǵa baǵyttalǵan.
