Jıyn jumysyna 700-den astam delegat qatysty. Olardyń qatarynda Parlament depýtattary, memlekettik organdar men dıplomatııalyq korpýs ókilderi, úkimettik emes uıymdar, bıznes qaýymdastyǵy, sondaı-aq otandyq jáne halyqaralyq sarapshylar bar. Sondaı-aq, forýmǵa 38 sheteldik qonaq, onyń ishinde 19 elshiliktiń ókilderi, 10 halyqaralyq uıym jáne alty elden kelgen delegattar qatysty.
Plenarlyq otyrys Memleket basshysynyń quttyqtaý sózimen ashyldy. Prezıdenttiń sózin QR Prezıdentiniń ishki saıasat jáne kommýnıkasııalar máseleleri jónindegi kómekshisi Arman Qyryqbaev oqyp berdi.
«Qazir Qazaqstanda 18 myńnan astam úkimettik emes uıym jumys isteıdi. Olardy memlekettiń senimdi seriktesi deýge tolyq negiz bar. Shyn máninde, sizder elimizdiń bereke-birligin nyǵaıtýǵa, «Adal azamat», «Zań men tártip», «Taza Qazaqstan» qaǵıdattaryn iske asyrýǵa belsene atsalysyp júrsizder. Men barshańyzǵa shynaıy rızashylyǵymdy bildiremin. Memleket azamattyq qoǵamnyń órisin keńeıtýge árdaıym basa mán beredi. Bes jylda arnaıy áleýmettik tapsyrysqa bólinetin qarjy eki esege jýyq ósti. Bul qarajat ıgi bastamalardy júzege asyrýǵa, muqtaj jandar men jastardy qoldaýǵa jumsalyp jatyr. Ortaq múdde jolyndaǵy osyndaı ózara tıimdi yqpaldastyq aldaǵy ýaqytta da jalǵasyn tabady.Búgingi basqosýda aıtylatyn salmaqty oı-pikirler men utymdy usynystar azamattyq qoǵamdy damytýǵa tyń serpin beredi dep senemin», delingen Memleket basshysynyń quttyqtaý hatynda.
Is-shara barysynda úkimettik emes uıymdar ókilderi turaqty damý men ekologııadan bastap, sıfrlandyrý, ınklıýzııa jáne jastar bastamalaryn qoldaý sııaqty negizgi baǵyttar boıynsha ózderiniń saraptamalyq baıandamalary men usynystaryn ortaǵa saldy. Forýmǵa qatysýshylar memleket, bıznes jáne azamattyq qoǵam arasyndaǵy tıimdi seriktestik – Ádiletti ári turaqty Qazaqstandy qalyptastyrýdyń berik irgetasy ekenin atap ótti.
QR Mádenıet jáne aqparat mınıstri Aıda Balaeva forým delegattaryna arnaǵan sózinde mazmundy baıandama jasaǵan barlyq qonaqtar men spıkerlerge alǵysyn bildirdi. Ol búgin aıtylǵan ıdeıalar men usynystar aldaǵy ýaqytta naqty iske asyp, qoǵamda ózara senimdi, áleýmettik jaýapkershilik pen ashyq dıalog mádenıetin nyǵaıtýǵa yqpal etetinine senim bildirdi.
Sonymen qatar Aıda Balaeva Parlamenttik reformanyń mańyzdylyǵyn atap ótip, bul ózgerister zańnamalyq bazany jetildirip, memlekettik sheshimder qabyldaý prosesin barynsha ashyq ári ádil etetinine nazar aýdardy.
«Prezıdent óz Joldaýynda atap ótken Parlament reformasy – eldiń saıası júıesin jańǵyrtýdyń mańyzdy kezeńi. Reforma zań shyǵarý mádenıetin jetildirip, memlekettik sheshim qabyldaý úderisin ashyq ári ádil etýge jol ashady. Osy rette barsha azamattyq qoǵam ókilderin bul bastamany tereń talqylap, onyń mánin qoǵamǵa túsindirýge belsene atsalysýǵa shaqyramyz», dedi mınıstr.
Sońǵy bes jyl ishinde Azamattyq forýmnyń qorytyndylary boıynsha ázirlengen usynymdarǵa súıene otyryp, Qazaqstanda strategııalyq mańyzy zor birqatar qujattar qabyldandy. Olardyń qatarynda «Azamattyq qoǵamdy damytýdyń 2030 jylǵa deıingi tujyrymdamasy», «Qoǵamdyq baqylaý týraly» zań, sondaı-aq onlaın-petısııalar ınstıtýtyn engizý jónindegi zańnamalyq túzetýler jáne ózge de mańyzdy bastamalar bar.
Sonymen birge, qoǵamdyq keńesterdiń qyzmetin retteý, beıbit jınalystar ótkizý, qaıyrymdylyq pen volonterlik qyzmetti damytý, sondaı-aq memlekettik áleýmettik tapsyrysty jáne úkimettik emes uıymdardy granttyq qarjylandyrýdy jetildirý baǵyttarynda eleýli ózgerister engizildi.
Respýblıkalyq forýmnyń aldynda elimizdiń barlyq óńirlerinde osyndaı 20 aımaqtyq kezdesý ótti. Olarǵa 3000-nan astam úkimettik emes uıym ókilderi qatysty. Budan bólek, jyl boıy salalyq mınıstrler men beıindi ÚEU ókilderiniń qatysýymen birqatar kezdesýler uıymdastyrylyp, olardyń nátıjesinde 200-den astam naqty usynys daıyndaldy.
