Prezıdent tapsyrmasy: Úkimet halyqtyń turmysyn jaqsartý sharalaryn ázirledi

Jıyn qorytyndysy boıynsha birqatar sheshim qabyldandy. Birinshi, búginnen bastap ınflıasııa deńgeıi turaqtanǵanǵa deıin AI-92 markaly benzın men dızel otyny baǵasyn odan ári kóterýge moratorıı engiziledi. Premer-mınıstr Energetıka mı­nıstrligine Básekelestikti qorǵaý jáne damytý agenttigimen jáne óńir ákimdikterimen birge tıisti qadaǵalaý júrgizýdi, sondaı-aq ishki naryqty JJM-men úzdiksiz qamtamasyz etý úshin qajetti sharalar qabyldaýdy tapsyrdy.

Ekinshi,  barlyq tutynýshy toby úshin kommýnaldyq qyz­metter tarıfin kóterý 2026 jyl­dyń I toqsanynyń sońyna deıin toqtatylady. Tarıfterdiń ósýin tejeý tabıǵı monopolııalar sýbektileriniń operasııalyq shyǵystaryn ońtaılandyrý esebinen qamtamasyz etiledi.  Bul rette TKSh júıesi nysandaryn­da jos­parlanǵan barlyq jón­­deý ju­mysy belgilengen merzimde aıaq­talýǵa tıis. Aıta ketý kerek, ha­lyqtyń áleýmettik jaǵy­nan osal toptary úshin turǵyn úı kómegin kórsetý tetigi qoldanylady.

Áleýmettik mańyzy bar azyq-túlik taýarlary baǵasynyń ósýine jol bermeý úshin otandyq aýyl sharýashylyǵy taýaryn óndirýshilerdi qarjylandyrý kólemin eki ese ulǵaıtý arqyly turaqtandyrý qorlarynyń jumysyna qosymsha serpin beriledi, bul óz kezeginde ÁMAT sanaty­na jatatyn ónimder baǵasy­nyń tómendeýine ákeledi. Deldal­dyq shemalar men saýda úste­melerin asyra qosý faktilerin anyqtaý jónindegi óńirlik komıssııalar jumysyn kúsheıtýge erekshe nazar aýdarylady.

Úshinshi, jańa Salyq kodeksi­niń shaǵyn jáne orta bıznes qyzmetine teris áserin azaıtý maqsatynda ońaılatylǵan deklarasııa negizindegi arnaıy salyq rejimin qoldanýǵa salynatyn basy artyq shekteýlerdi alyp tastaý týraly sheshim qabyldandy. Tyıym salynǵan tizimde, qoldanystaǵy zańnamada­ǵydaı, tek 44 qyzmet túri saqta­lady. Odan bólek, 2026 jylǵy 1 qańtardan bastap salyqtyq ákimshilendirý «taza paraqtan» júrgiziledi, bul mıkro jáne shaǵyn bızneske qatysty kelesi jaıttardy kózdeıdi:

- salyqtyq tekserýler alynyp tastalady;

- kameraldyq baqylaý alynyp tastalady;

- sot organdaryna mámilelerdi jaramsyz dep taný týraly talap-aryz berý toqtatylady;

- sot organdaryna tirkeýdi, qaıta tirkeýdi jaramsyz dep taný týraly talap-aryz berý toqtatylady.

Salyqtar men tólemder boıynsha salynǵan ósimpuldar men aıyppuldar 2026 jyldyń 1 sáýirine deıin negizgi qaryz ótelgen jaǵdaıda joıylady. QQS boıynsha esepke qoıý sheginen asqan salyq tóleýshiler ákimshi­lik jaýapkershilikke tartylmaı­dy. Sondaı-aq salyq tóleýshiler úshin salyq jáne ádilet organdarynda kameraldyq jáne salyqtyq tekserýler júrgizbeı-aq, ońaılatylǵan tártippen esepten shyǵarý naýqany ótkiziledi. Bul jańa Salyq kodeksin kezeń-kezeńimen engizýge jáne salyq tóleýshiler úshin salyqtyq ákimshilendirýdi jeńildetýge múmkindik beredi.

Tórtinshi, bazalyq mólsherle­meniń kóterilýine baılanysty ekinshi deńgeıli bankter tarapynan ıpotekalyq baǵdarlamalar boıynsha usynystardyń qysqarýy aıasynda turǵyn úı-qurylys jınaq júıesin qoldaý týraly sheshim qabyldandy. Soǵan sáıkes, halyq úshin arzandatylǵan ıpotekalyq nesıe kólemi eki ese ulǵaıady, bul turǵyn úıge qoljetimdilikti qamtamasyz etýge múmkindik beredi. Atalǵan shara qolda­nystaǵy «Naýryz» jáne «Naýryz-Jumysker» baǵdar­lama­lary arqyly nesıeleý kólemin 500 mlrd teńgege deıin ulǵaıtý jolymen júzege asyrylady.

Sonymen qatar suranysqa ıe «Áskerı baspana» baǵdarlamasy qaıta iske qosylady, ol jyl saıyn keminde 7 myń áskerı qyzmetshiniń otbasyna jańa úıden bólek, qaıtalama naryqtan da páter satyp alýǵa múmkindik beredi. Qurylys kompanııalarymen osy baǵdarlamalar sheńberin­de salynatyn turǵyn úı qury­lysy boıynsha ofteık-kelisim­sharttar jasalady. Bul ret­te qurylys salýshylar úsh jylǵa baǵany bekitý boıynsha qarsy mindettemeler qabyldaıdy.

Besinshi, otandyq avtoóndirý­shiler men ekinshi deńgeıli bank­ter halyqtyń jeńil avtokólik satyp alýyn qarjylandyrý baǵdar­­lamalaryn odan ári jal­ǵas­tyrady. Jeke tulǵalarǵa jeńil avtokólik satyp alý boıynsha lızıng tetigi engiziledi. Bul azamat­tardyń avtokólik satyp alý múmkindikterin keńeıtý­ge ba­ǵyttalǵan. Odan bólek, «Báıterek» holdıngine qysqa mer­zim­de shaǵyn jáne orta bıznes­ti qol­daýdyń qosymsha sharalary bo­ıynsha usynystar berý tapsyryldy.

Premer-mınıstr Úkimet júrgizip otyrǵan reformalar elimizdiń uzaqmerzimdi turaqty ekonomıkalyq ósýin qamtamasyz etýge, ekonomıkada bazalyq naryqtyq qaǵıdattardy tereń ornyqtyrýǵa baǵyttalǵanyn atap ótti. Bul rette Úkimet Memle­ket basshysynyń árbir qazaqstan­dyqtyń ál-aýqatyn arttyrý qajettigi týraly nusqaýlaryn, ekonomıkalyq damýdyń negizgi kórsetkishi retinde qarastyra otyryp, qatań ustanady.