Reseıdiń Máskeý qalasynda taý-shańǵy salasynyń úzdikterin anyqtaıtyn SKI BUSINESS AWARDS júldesimen marapattaý sharasy ótti. 2024-2025 jylǵy maýsymnyń nátıjesinde «Shymbulaq» taý kýrorty TMD elderindegi eń bedeldi atalymda jeńimpaz dep tanyldy. Bıyl alǵash ret «Eń úzdik taý-shańǵy kýrortynyń basshysy» atalymyn engizilip, «Shymbulaqtyń» bas dırektory Rınat Abdrahmanovtyń eńbegi erekshe atap ótildi.
Uıymdastyrýshylardyń málimetinshe, bıyl baıqaýǵa 50 nomınasııa boıynsha 240-tan astam úmitker qatysqan. Jeńimpazdar qazylar alqasynyń sheshimi men iri taý-shańǵy portaly Ski.ru uıymdastyrǵan ashyq daýys berý nátıjesinde anyqtaldy. Úzdikterdi anyqtaý kezinde kompanııalardyń salanyń damýyna qosqan úlesi ǵana emes, sala jetekshileriniń jeke jetistikteri de saralandy.
«Shymbulaq» TMD-daǵy «Eń úzdik taý-shańǵy kesheni» atalymynda qatarynan úshinshi jyl úzdik dep tanylyp otyr. 2022 jyly kýrort ShYU elderi arasyndaǵy «Eń úzdik taý-shańǵy kýrorty» ataǵyn ıelense, byltyr TMD kýrorttary arasynda negizgi marapatpen qatar, «Eń úzdik glempıng/kempıng» atalymymen marapattaldy.
«О́tken maýsymda «Shymbulaqqa» 1,5 mıllıonnan astam adamnyń kelgeni – kýrortqa tek jergilikti demalýshylar ǵana emes, sheteldik týrısterdiń de qyzyǵýshylyǵy artyp kele jatqanyn ańǵartady. SKI BUSINESS AWARDS marapatynyń bıylǵy jeńisi – bul komandanyń kásibı jumysynyń, ınfraqurylymdy damytý jáne qyzmet sapasyn arttyrý jolyndaǵy eńbeginiń nátıjesi. Mundaı bedeldi marapattar óńirimizdegi ózge de taý-shańǵy kýrorttaryna serpin beretini anyq», deıdi Eýrazııalyq taý kýrorttary alıansynyń bas hatshysy Andreı Kýkýshkın.
SKI BUSINESS AWARDS júldesi 2018 jyly taý-shańǵy ındýstrııasynyń kásibı mamandaryn yntalandyrý jáne salanyń bedelin arttyrý maqsatynda taǵaıyndaldy. Jyl saıyn bul marapatqa «Roza Hýtor», Oi-Qaragai Mountain Resort, «Elbrýs», «Krasnaıa polıana», «Sheregesh» sııaqty áıgili kýrorttardyń jobalary usynylady. «Shymbulaqtyń» kezekti ret TMD aýmaǵynda úzdik kýrort dep tanylýy elimizdegi taý-shańǵy salasynyń joǵary áleýetin jáne eldiń týrıstik bedelin artyp kele jatqanyn ańǵartady.
