Prezıdent • 21 Qazan, 2025

Byltyr Ázerbaıjan arqyly 1,5 mln tonnaǵa jýyq qazaqstandyq munaı tasymaldanǵan

40 ret

kórsetildi

4 mın

oqý úshin

Qasym-Jomart Toqaev pen Ilham Álıev ekijaqty kelissóz jáne Qazaqstan – Ázerbaıjan Joǵary memleketaralyq keńesi otyrysynyń qorytyndylary boıynsha buqaralyq aqparat quraldary ókilderine arnalǵan brıfıng ótkizdi, dep jazady Egemen.kz.

Dana MYRZAQADIR

Byltyr Ázerbaıjan arqyly 1,5 mln tonnaǵa jýyq qazaqstandyq munaı tasymaldanǵan

Foto: Aqorda

Kelissózderde energetıka salasyndaǵy yntymaqtastyqty nyǵaıtý mańyzdy taqyryptyń biri boldy. Bul baǵytta eki eldiń de áleýeti mol.

«Qazaqstan munaıyn Baký – Tbılısı – Jeıhan baǵdary boıynsha tasymaldaý jónindegi birlesken jumysty erekshe atap ótkim keledi. Byltyr Ázerbaıjan arqyly bul strategııalyq shıkizat tranzıti bir jarym mıllıon tonnaǵa jýyqtady. Jaqyn arada muny aıtarlyqtaı ulǵaıtý qajet. Teńiz tabanyna tóseletin elektr kabelderi jobasy ulttyq energııa júıesin damytýǵa serpin beredi. Bul bizdiń «jasyl» energııa eksportyndaǵy pozısııamyzdy kúsheıte túsedi. Ázerbaıjan aýmaǵy arqyly qazaqstandyq ýran ónimderin shetel naryqtaryna jetkizý aıasynda aýqymdy jumys júrgizilip jatyr. Osy oraıda barlyq negizgi bastamalar men jobalarǵa qoldaý kórsetkeni úshin qurmetti Ázerbaıjan Prezıdentine rızashylyǵymdy bildiremin», dedi Prezıdent.

Memleketter basshylary jasandy ıntellektiniń qarqyndy damyp kele jatqanyn eskere otyryp, IT sektor ekijaqty qatynastarǵa mol múmkindik ashatynyna toqtalǵan.

«Qazaqstan memlekettik qyzmetti sıfrlandyrýda, IT tehnologııalardy damytýda tájirıbe jınaqtady. Biz osy salada birlesken jobalardy iske asyrýǵa daıynbyz. Kelissózder barysynda Kaspıı teńiziniń tabany arqyly talshyqty-optıkalyq baılanys jelisin tartý jobasyn jedeldetýdiń mańyzyn atap óttik. Úkimetterge ony qysqa merzim ishinde ázirleý jóninde tapsyrma berildi», dedi Qasym-Jomart Toqaev.

Qasym-Jomart Toqaev: «Bakýde byltyrdan beri Qazaqstan-Ázerbaıjan ǵylym jáne bilim ortalyǵy qyzmet etedi»

Ekijaqty kún tártibinde mádenı-gýmanıtarlyq saladaǵy yqpaldastyq erekshe oryn alady.

«Keıingi jyldarda eki elde alma-kezek ótken Qazaqstan men Ázerbaıjannyń Mádenıet kúnderi jáne Kıno kúnderi aıtýly oqıǵaǵa aınaldy. Bul baǵyttaǵy jumysty júıelendirý úshin Mádenı yntymaqtastyq baǵdarlamasyn qabyldaýǵa ýaǵdalastyq. Bilim men ǵylymdy, jastar baılanysyn damytýdyń perspektıvasy mol ekenine arnaıy toqtaldyq. Osy maqsatta Bakýde byltyrdan beri Qazaqstan-Ázerbaıjan ǵylym jáne bilim ortalyǵy qyzmet etedi», dedi Memleket basshysy.

Sondaı-aq taraptar óńirlik jáne jahandyq kún tártibiniń ózekti máseleleri jóninde pikir almasqan.

«Biz halyqaralyq saıasattyń barlyq ózekti máseleleri boıynsha ustanymdarymyz uqsas ekenin atap óttik. Kópjaqty qurylymdar aıasyndaǵy jumysty úılestirýdiń mańyzyna mán berildi. О́ńirlik jáne jahandyq deńgeıde beıbitshilik, qaýipsizdik pen turaqtylyqty nyǵaıtýǵa umtylatynymyzdy jetkizdik. Barshańyzǵa belgili, Prezıdent Ilham Geıdar oglý Álıev Prezıdent Tramptyń belsendi araaǵaıyndyǵymen Vashıngtonda Ázerbaıjan men Armenııa arasynda beıbit deklarasııaǵa qol qoıyp, tarıhı mıssııasyn oryndady. Qazaqstan muny resmı túrde quptady. Qol jetkizilgen kelisimder Ońtústik Kavkazdaǵy senimdi nyǵaıtyp, jalpyǵa ortaq órkendeý úshin jańa múmkindikterge jol ashady dep oılaımyn. Jalpy, sapar qorytyndysy baýyrlas halyqtardyń ıgiligi úshin strategııalyq seriktestik pen odaqtastyq rýhyndaǵy qazaq-ázerbaıjan qarym-qatynastaryn odan ári damytýǵa qos tarap ta daıyn ekenin aıqyn kórsetedi», dedi Qasym-Jomart Toqaev.

Ilham Álıev ekijaqty baılanystardyń joǵary deńgeıine nazar aýdardy

«Halyqtarymyzdy ortaq rýhanı-mádenı qundylyqtarǵa arqa súıegen ǵasyrlardan tamyr tartatyn dostyq pen baýyrlastyq qatynastar baılanystyrady. Bul – bizdiń memleketaralyq yntymaqtastyǵymyzdyń berik irgetasy. Sońǵy úsh jylda bir-birimizge onnan asa sapar uıymdastyrdyq. Yqpaldastyǵymyzdyń qanshalyqty qarqyndy ekenin osydan-aq ańǵarýǵa bolady. Árbir kezdesý, árbir talqylaý túpki nátıjeni kózdeıdi. Búgin biz salalyq mınıstrlikterdiń esebi men keleshek josparlaryn tyńdadyq. Jumys qorytyndysyna kóńil tolady. О́ıtkeni belgilengen mindetterdiń bári oryndalyp jatyr. Memleketaralyq keńes aıasynda qol jetkizilgen kelisimder halyqtarymyzdyń ıgiligine qyzmet etedi», dedi Ázerbaıjan Prezıdenti.