Sýretterdi túsirgen – Erlan OMAR, «EQ»
Saltanatty sharaǵa Senat tóraǵasy Máýlen Áshimbaev, Mádenıet jáne aqparat mınıstri Aıda Balaeva, Parlament depýtattary, Prezıdent janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa músheleri, qoǵamdyq uıymdardyń basshylary qatysty.
Ulttyq baıqaýdyń bıylǵy marapattaý saltanatyna 17 oblys pen 3 megapolısten úzdik shyqqan 20 otbasy qatysty. Jyl saıyn júlgesi úzilmeı jalǵasyn taýyp kele jatqan otbasylyq qundylyqty dáripteıtin biregeı joba jeńimpazdaryn Senat tóraǵasy Máýlen Áshimbaev marapattady. Saltanatty ashylý sharasynda Senat spıkeri baıqaýdyń Respýblıka kúnimen tuspa-tus kelgenine toqtaldy. Bıyl Memlekettik egemendik týraly deklarasııanyń qabyldanǵanyna 35 jyl tolyp otyrǵanyn aıtyp, dástúrli biregeı baıqaýdyń osyndaı mereıli mereke qarsańynda ótkizilýi erekshe mánge ıe ekenine toqtaldy.
«Qazaq – qashanda otbasyn qasıetti uǵym sanaǵan halyq. Otbasynyń beriktigi men yntymaǵy – ulttyń birligi men turaqtylyǵynyń kepili. Sondyqtan ata-anany ardaqtaý, týystyq qatynastardy nyǵaıtý sııaqty qundylyqtar ult mádenıetiniń ózegine aınaldy. Qazirgi tańda Memleket basshysy Qasym-Jomart Toqaevtyń tapsyrmasymen osy sabaqtastyqty ári qaraı saqtaý maqsatynda aýqymdy jumys atqarylyp jatyr. Bul rette otbasy ınstıtýtyn nyǵaıtýǵa, ana men balany qorǵaýǵa, qoǵamda durys qundylyqtar júıesin nasıhattaýǵa basa mán berilip otyr. Prezıdent bıylǵy Joldaýynda da otbasylardy qoldaýǵa, ana men balanyń quqyn qorǵaýǵa arnalǵan mańyzdy mindetter júktedi. Bul áleýmettik bastamalardyń bári elimizde otbasy qundylyqtarynyń nyǵaıýyna, azamattardyń ómir súrý sapasyn jaqsartýǵa yqpal etedi dep senemiz», dedi M.Áshimbaev.
Sonymen qatar Senat spıkeri palatanyń Memleket basshysy júktegen tapsyrmalardy oryndaý aıasyndaǵy zań shyǵarý qyzmetinen de qulaǵdar etti. El ıgiligine aınalǵan «Ulttyq qor – balalarǵa», «Keleshek mektepteri» sııaqty keshendi jobalar men bilim úderisine sıfrlyq tehnologııalardy engizý jolyndaǵy irgeli isterdi atap ótti. Ulttyq baıqaý jeńimpazdaryna tileýlestigin bildirgen M.Áshimbaev otbasylyq qundylyqtardy dáripteýdiń eren úlgisin kórsetken jandarǵa alǵysyn aıtty.
Bıylǵy «Mereıli otbasy» ulttyq baıqaýynda jeńimpaz dep tanylǵan otbasylarǵa qomaqty qarjylaı syıaqy tabystaldy. Olardyń arasynda Aqmola oblysynan – ulttyq ónerdi ulyqtaǵan Mekebaı áýleti, Almaty oblysynan – qolónershi Bekdaıyr áýleti, Aqtóbe oblysynan – Tóremurat áýleti, Abaı oblysynan Sydyqbaı áýleti bar. Aımaqtyq irikteýde Astanadan – Aıtqoja áýleti, Almatydan – Dúısebaı áýleti, Shymkentten Nurtaı áýleti úzdik dep tanyldy. Batys Qazaqstan oblysynan – Súıinǵara áýleti, Qaraǵandy oblysynan – óńirge belgili kenshiler Klıýchnıkov áýleti, Soltústik Qazaqstannan – mehanızator О́zbek áýleti, Atyraý oblysynan – temirjolshy О́tep áýleti, Qostanaıdan – jumysshy Egemberdi áýleti, Jambyldan temirjolshy Bektas áýletiniń de mereıi ústem boldy. Jetisý oblysynan – mádenı, sporttyq muralardy nasıhattaýǵa úles qosyp júrgen Bekten áýleti, Pavlodar oblysynan – kenshiler Tursynbaı áýleti, Ulytaý oblysynan – aýyl sharýashylyǵy salasynyń mamandary Qapbas áýleti, Qyzylorda oblysynan – jumysshy Ábsadyq áýleti, Mańǵystaý oblysynan – qoǵam men sharýashylyqqa eńbegi sińgen Sholtaman áýleti, Túrkistan oblysynan – agronom Moldabek áýleti, Shyǵys Qazaqstan oblysynan tabıǵatty qorǵaýshy Jaqyp áýleti de úzdikter qatarynan kórindi.
Batys Qazaqstan oblysy, Bórli aýdany, Aqsaı qalasynyń 89 jastaǵy turǵyny Muratbaı Súıinǵara ózin qanjyǵaly Bógenbaı batyrdyń urpaǵymyn dep tanystyrdy.
– Buǵanam bekip, belim qatpaı jatyp eńbekke aralastym. О́zim áke-sheshemnen erte aıyryldym. Aýyl sharýashylyǵy salasynda jemisti eńbek etip, zeınetke shyqtym. О́mirge on bala ákelip ósirip, olardan nemere, shóbere súıip otyrmyn. Ul-qyzdarym ár mamandyq ıesi. Biri ustazdyq etedi, biri quqyq qorǵaý salasynda, biri munaı óndirý isinde, biri aýyl sharýashylyǵynda úlgili maman atandy, – deıdi eńbek ardageri.
Baıqaý jeńimpazdarynyń arasynda Almaty oblysynan úzdik dep tanylǵan Bekdaıyr áýleti kópshilikti ózderi jasaǵan buıymdarmen tánti etti. Sheberdiń qolynan shyqqan ulttyq naqyshtaǵy kıimderi zergerlik áshekeılerimen úılesim taýyp, quıyp qoıǵandaı jarasady.
– Qolónershilik babamyzdan mıras qundylyǵymyz, – deıdi otaǵasy Qońyr Egenuly. Qarasaı aýdanynyń ortalyǵy Qaskeleńde turatyn bul áýlet ulttyq kıimnen bólek, er shaýyp, órimshilikti óristetip, tipti úıdiń jabdyqtaryna deıin jasaıtynyn aıtty. – Balalarym ertoqym shabady, teri ılep, taspa tilip, júgen, noqta, qamshy óredi. Qyzdarym anasynyń kómekshisi, ıne sabaqtap kıim tigedi, júnnen syryp ta túrli buıymdar jasaıdy. «Mereıli otbasy» baıqaýyna buǵan deıin de qatysyp, irikteýden óte almadyq. Bul joly tyńǵylyqty ázirlenip, 84 otbasynyń ishinen úzdik shyǵyp, joldama aldyq. Maqsatymyz – maldyń júninen toqylyp, syrylyp jasalatyn kıimderdiń artyqshylyǵyn nasıhattaý. Tórt túliktiń terisi men júnin óńdep kádege jaratý áli de aqsap tur. Baǵasyn baıyptap, qadirine jete almaı júrmiz. Astanaǵa ózimiz tikken kıimderdi kıip, áshekeı buıymdardy taǵynyp keldik. Kópshiliktiń qyzyǵýshylyǵy da erekshe, tipti tapsyrys bergender de bar, – deıdi Q.Bekdaıyr.
«Astana Ballet» teatrynda ótken ulttyq baıqaýdyń saltanatty keshinde belgili óner sheberleri áýelete án shyrqap, kúmbirlete kúı tógip, kórermenderge erekshe kóńil kúı syılady.
2014 jyldan beri turaqty uıymdastyrylatyn «Mereıli otbasy» ulttyq baıqaýynyń irikteýine búginge deıin 20 myńnan astam otbasy qatysty. Jyldan-jylǵa olardyń qatary artyp, eńbek pen sportta, shyǵarmashylyq, zııatkerlik salalarynda, ǵylym men ónerde eren jetistikke jetken otbasylar baǵyn synap keledi.
Bıylǵy baıqaýǵa barlyq óńirden 3 434 ótinim túsken. Ár óńirde daralanyp, jeńimpaz atanǵan otbasylarǵa 1 mıllıon teńge kóleminde syıaqy berildi.
