Konferensııany Ál-Farabı atyndaǵy Qazaq ulttyq ýnıversıtetiniń basqarma tóraǵasy-rektor Janseıit Túımebaev ashyp, qatysýshylardy Respýblıka kúnimen quttyqtady. Rektor ulttyq birliktiń sımvolyna aınalǵan bul kúndi merekeleý maqtanysh pen bolashaqqa degen senimmen atap ótiletinine toqtaldy. Aıtýynsha, akademıkter Sultan Sartaev pen Salyq Zımanov syndy ult zııalylarynyń eńbekterin erekshe atap ótip, olardyń esimderi elimizdiń konstıtýsıonalızm tarıhynda máńgilikke jazylyp qaldy.
– Qazirgi tańda Qazaqstan sıfrlyq tehnologııalar men jasandy ıntellekt dáýirinde jańa beleske qadam basty. Prezıdent Qasym-Jomart Toqaevtyń basshylyǵymen elimiz «Zań jáne tártip» qaǵıdattaryna negizdelgen jańǵyrý strategııasyn tabysty iske asyryp jatyr. Bul baǵyt ádilettilik, ashyqtyq jáne jaýapkershilik qundylyqtaryn turaqty damýdyń basty ustanymyna aınaldyrdy», – dedi rektor.
Is-shara barysynda Parlament Májilisiniń depýtaty Irına Smırnova, zań ǵylymynyń doktory, professor Igor Rogov, Almaty qalasy prokýrorynyń orynbasary Damır Qataev jáne ózge de qatysýshylar quttyqtaý sóz sóılep, jıyn plenarlyq otyrystarda jalǵasty.
Elimizdiń kórnekti ǵalymdary men sarapshylary Qazaqstannyń egemendigi men memlekettiliginiń qalyptasýy, saıası júıeniń damýy, áleýmettik-ekonomıkalyq jáne quqyqtyq jańǵyrý úderisteri jóninde mazmundy baıandama jasady.
Konferensııanyń seksııalyq otyrystarynda «Egemen memleket retindegi Qazaqstannyń konstıtýsııalyq-quqyqtyq damýy», «Memlekettik egemendik – qundylyq retinde: syn-qaterler men bolashaqqa pánaralyq kózqaras», «Ekonomıkalyq saıasat jáne turaqty damýdyń konstıtýsııalyq qaǵıdattary» jáne taǵy basqa taqyryptar keńinen talqylandy.
Alqaly jıynǵa elimizdiń jáne sheteldiń bedeldi ǵalymdary, memleket jáne qoǵam qaıratkerleri, ýnıversıtet basshylyǵy, belgili ǵalymdar, professorlar, oqytýshylar men stýdentter qatysty.
ALMATY
