Qazaqstan Respýblıkasy Qarýly kúshteriniń Ulttyq áskerı-patrıottyq ortalyǵy uıymdastyrǵan bul jobanyń ereksheligi – ulttyq óner men zamanaýı tehnologııalardyń úılesiminde boldy. Konsert tarıhynda alǵash ret júrgizýshi rólin jasandy ıntellekt atqardy.
Jobanyń avtory Ulttyq áskerı-patrıottyq ortalyǵynyń bastyǵy, Qazaqstannyń eńbek sińirgen qaıratkeri Arman Ásenovtiń aıtýynsha, konsert qoıylymynda jasandy ıntellektti qoldaný tehnologııa men ónerdi biriktiretin jańa rýhanı qabyldaý formatyn qalyptastyrý jolyndaǵy alǵashqy qadam bolyp tabylady.
Is-sharaǵa Qorǵanys mınıstrliginiń basshylyǵy, Aqmola garnızonynyń áskerı qyzmetshileri jáne olardyń otbasylary, «Jas sarbaz» áskerı-patrıottyq qozǵalysynyń tárbıelenýshileri, sondaı-aq elorda turǵyndary men qonaqtary qatysty.
Ulttyq biregeılikti nyǵaıtýǵa jáne Otan qorǵaýshy beınesin dáripteýge baǵyttalǵan konserttik baǵdarlamaǵa Ortalyq áskerı orkestr, Ortalyq ansambl jáne «Jas sarbaz» balalar stýdııasy qatysty.
Merekelik keshtiń «Tarıhpen úndes taǵdyr» atty alǵashqy bólimi qazaq halqynyń tarıhı jady men rýhanı tamyryna arnaldy. Kórermender estradalyq-sımfonııalyq orkestr men «Saǵym» bı ujymynyń ónerin jyly qabyldady.
Al «Birlik pen beıbitshilik» bólimi dostyq pen ultaralyq kelisim taqyrybyna arnaldy. Sahnada Ortalyq ansambldiń folklorlyq-etnografııalyq orkestri, sondaı-aq Erkebek Qabdrahmanov, Aǵybaı Údeshov, Álııa Áýkenova, Mádına Qabdolla, Mádına Sybanqulova jáne «Jas sarbaz» stýdııasynyń jas vokalısteri óner kórsetti.
«Meniń Qazaqstanym – meniń Respýblıkam» atty bólimde «Qarýly kúshter», «Batyr júrek sarbazdar», «Qazaq uldary», «Men qazaq», «Úzilmes úmit» jáne «Halyqtar dostastyǵy» sekildi Otanǵa degen súıispenshilik pen azamattyq jaýapkershilikti dáripteıtin ánder shyrqaldy.
Konserttiń fınaldyq bólimi «Sıfrlyq bolashaq» — Qazaqstannyń damý men progreske umtylysyn beıneledi. Ártister «Qazaqstan», «Qyran» jáne «Egemen Qazaqstan» ánderin oryndady.
Kórermender konserttiń jańashyldyǵyn jáne tehnologııalyq ereksheligin joǵary baǵalap, ár nómirdi ystyq yqylaspen qarsy aldy. Bul konsert óner, patrıotızm jáne ınnovasııanyń úılesken jarqyn úlgisine aınaldy.
