Densaýlyq saqtaý basqarmasynyń basshysy Talǵat Moldabekovtiń málimdeýinshe, búginde 62 nysannyń qurylysy aıaqtalyp, tapsyrý, qabyldaý rásimderi júrgizilip jatyr.
– Byltyr Úkimet rezervinen 12,6 mlrd teńge, oblystyq bıýdjetten 1,4 mlrd teńge bólinip, tolyq ıgerildi. Bıyl qalǵan úsh nysan – Úrjar, Aqsýat aýdandaryndaǵy Qojageldi, Aqqala aýyldarynda medısınalyq pýnktter paıdalanýǵa beriledi. Sonymen qatar segiz nysanda qurylys, qaıta jańartý jumystary jalǵasyp jatyr. Olardyń qatarynda Aıagóz aýdanyndaǵy jan saqtaý bólimshesi men MRT ǵımaraty, sondaı-aq Úrjar aýdanyndaǵy emdeý ortalyǵy bar. Búginde 57 nysan sanıtarlyq-epıdemıologııalyq qorytyndy alyp, 51 mekeme lısenzııalanǵan, – dedi T.Moldabekov.
Basqarma basshysynyń aıtýynsha, Jańasemeı aýdanynda 14 jańa nysannyń jobalyq-smetalyq qujattamasy ázirlenip, memlekettik saraptamaǵa joldanǵan. Jobalar aýyl turǵyndaryna kórsetiletin medısınalyq kómektiń qoljetimdiligin arttyryp, sapasyn jaqsartýǵa baǵyttalǵan. Sondaı-aq keıingi eki jylda óńirdegi 25 medısınalyq mekeme kúrdeli jóndeýden ótti. Bári de búgingi zaman talaptaryna saı qural-jabdyqtarmen qamtylǵan. Jyl sońyna deıin taǵy 16 nysanda jóndeý jumystaryn júrgizý kózdelip otyr.
Abaı oblysy
