Ádebı-sazdy keshke qala turǵyndary, zııaly qaýym ókilderi, qalamgerler, ǵalymdar men jastar qatysty.
Kesh shymyldyǵyn Qazaqstan Jazýshylar odaǵynyń Basqarma tóraǵasy, Ulttyq quryltaı múshesi, jazýshy Mereke Ábdeshuly Qulkenov ashyp berip, sharanyń mán-mańyzyna toqtaldy.
«Búgin biz qazaq etnografııasynyń eńseli tulǵasy, qalamy men ǵumyryn halqymyzdyń bolmysyn tanyp-bilýge arnaǵan jazýshy-etnograf Zeınolla Sániktiń 90 jyldyq mereıtoıyna arnalǵan saltanatty jıynda bas qosyp otyrmyz. Bul – bir adamnyń ǵana mereıtoıy emes, bul – tutas ult rýhanııatyna jáne ony qyzǵyshtaı qorǵap, kóziniń qarashyǵyndaı saqtaǵan jandarǵa taǵzym etý. Zeınolla Sánik – halqymyzdyń kóneden jetken mádenı, rýhanı qazynalaryn jınaqtap, júıelep, ǵylymı turǵyda saralaǵan, sonymen birge kórkem sózdiń qudiretin etnografııalyq tanymmen ushtastyrǵan tulǵa. Ol – dástúr men ádebıettiń, tarıh pen taǵylymnyń toǵysqan tusyndaǵy kópir. Onyń shyǵarmalary – halqymyzdyń turmys-tirshiligi men dúnıetanymynyń shejiresi, ult minezin, salt-sanasyn tanytatyn aına. Ol jazǵan «Qazaqtyń turmys-salt bilimderi», «Tabıǵat tálimi», «Dala mádenıeti týraly tolǵanystar», «Qazaq etnografııasy» syndy eńbekter – tek etnografııalyq týyndy ǵana emes, ult bolmysyn urpaq sanasyna sińirer taǵylymdy mektep»,- dep atap ótti Mereke Qulkenov.
