Forým shuǵyl medısınany úılestirýdiń ulttyq ortalyǵy bazasynda ótti jáne túrli elderdiń jetekshi mamandarynyń tájirıbe almasýyna arnalǵan alań boldy. Eki kún boıy Qazaqstan, Túrkııa, Avstrııa, Koreıa, Qytaı, Polsha, Ázerbaıjan, Germanııa, BAÁ, Reseı, Belarýs, Qyrǵyzstan jáne О́zbekstan elderiniń kardıologtary men arıtmologtary arıtmologııa salasyndaǵy ózekti baǵyttardy talqylady.
«Basty taqyryptardyń qatarynda – Qazaqstandaǵy júreksheler fıbrıllıasııasyn ablasııalaý tájirıbesi, kateterlik emdeý ádisterin salystyrý, eresekterdegi júrek aqaýlarymen baılanysty arıtmııalar, kenetten bolatyn júrek óliminiń aldyn alý, sondaı-aq kardıoverter-defıbrıllıatorlardy jáne fızıologııalyq kardıostımýlıatorlardy ımplantasııalaýdaǵy ınnovasııalar bar», – dep habarlady mınıstrlik.
Mamandar júrek yrǵaǵy buzylýyn joǵary tehnologııalyq ádistermen emdeýdiń jańa tásilderine erekshe nazar aýdardy. Uıymdastyrýshylardyń aıtýynsha, Qazaqstanda arıtmologııalyq kómekti damytý qarqyndy júrip jatyr.
«Bıyl mamyr aıynda Shuǵyl medısınany úılestirýdiń ulttyq ortalyǵy qurylymynda Júrek yrǵaǵy ortalyǵy ashyldy. Ol kúrdeli operasııalardy oryndaýǵa arnalǵan zamanaýı jabdyqtarmen tolyq qamtamasyz etilgen. Munda 3D-navıgasııalyq kartalar jasaý, radıojıilik jáne ımpýlstik ablasııa, elektrodsyz kardıostımýlıatorlardy ornatý, sondaı-aq endokardıaldyq elektrodtardy alý sııaqty kúrdeli prosedýralar jasalady», – dep habarlady vedomstvo.
