- 2029 jyly jasóspirimder arasyndaǵy IV jazǵy Azııa oıyndarynyń alaýy Tashkentte tutanatyn boldy. Bul sheshim kúni keshe ǵana Bahreınde ótken Azııa Olımpıadalyq keńesiniń otyrysynda qabyldandy. Esterińizge sala keteıik, buǵan deıingi jarystar 2009 jyly Sıngapýrde, 2013 jyly Nanjınde, bıyl Manamada uıymdastyryldy.
- 7–21 qarasha aralyǵynda Saýd Arabııa astanasy Er-Rııadta alaýy tutanatyn Islam yntymaqtastyǵy oıyndarynda elimizdiń aýyr atletteri qandaı quramada kúsh synasatyny belgili boldy. Parsy shyǵanaǵyna attanatyndar tiziminde Edige Emberdi (79 kg), Nurǵısa Ádiletuly (94 kg), Artıom Antropov (110 kg), Darıa Balabaıýk (63 kg), Araı Nurlybekova (69 kg), Aıanat Jumaǵalı (77 kg), Arýjan Dáýletova (86 kg), Lıýbov Kovalchýk (+ 86 kg) syndy ziltemishiler bar.
- Bıyl bokstan World Boxing uıymynyń muryndyq bolýymen ótetin Álem kýbogine qatysatyn 18 komanda anyqtaldy. Olar – Qazaqstan, О́zbekstan, Aýstralııa, Japonııa, Aýstrııa, Taıpeı, Qyrǵyzstan, Anglııa, Nıgerııa, Fınlıandııa, Polsha, Germanııa, Ońtústik Koreıa, Úndistan, Ispanııa, Iran, Ýkraına, Italııa. Solardyń arasynan ozyp shyqqandary 15–23 qańtar aralyǵynda Nıý-Delıde uıymdastyrylatyn fınaldyq saıysta kúsh synasady.
- Halyqaralyq konkıshiler odaǵy (ISU) áıelder arasyndaǵy mánerlep syrǵanaýshylardyń reıtıngin jarııalady. Úzdikter tiziminde jerlesimiz Sofııa Samodelkına 1 438 upaıpen 37-satyǵa jaıǵasty. Kósh basynda Japonııanyń qos juldyzy – Kaorı Sakamoto (4 786 upaı) men Mone Chıba (4 110 upaı). Úzdik úshtikti amerıkalyq Izabo Levıta (4 007 upaı) túıindedi.
- Er-Rııadta shymyldyǵy túrilgen WTA qorytyndy týrnırin elimizdiń eń úzdik tennısshisi Elena Rybakına jeńispen bastady. Tusaýkeser kezdesýinde álemniń tórtinshi raketkasy, bıyl Ýımbldon men US Open dodalarynyń fınalısi, amerıkalyq Amanda Anısımovany 6:3, 6:1 esebimen utty. Kezdesý nebári 58 mınýtqa sozyldy. Ekinshi týrda Elena WTA reıtınginde ekinshi orynda turǵan polshalyq Iga Shventekpen sheberlik baıqasady.
- ÝEFA-nyń resmı saıtynda 2028, 2029 jyldary ótetin Chempıondar lıgasy, Eýropa lıgasy, Konferensııa lıgasynyń sheshýshi oıyndaryn qabyldaýǵa nıet bildirgen 15 memlekettiń tizimi jarııalandy. Solardyń qatarynda bizdiń el de bar. Bul kezdesýlerdi joǵary deńgeıde uıymdastyrýǵa Astana men Almaty qalalary aıryqsha qulshynys tanytyp otyr.
- Elimizdiń Premer-lıgasynda jankúıerlerdiń eń kóp qoldaýyna ıe bolǵan komandalardyń tizimi jarııalandy. Bul reıtıngte «Qaırat» kósh bastap tur. О́z alańynda, syrtta ótken matchtarda almatylyq klýbty barlyǵy 241 194 kórermen (ár matchta orta eseppen 9 277 adam) qoldaǵan eken. Ekinshi, úshinshi oryndarda – «Aqtóbe» (224 651, orta eseppen – 8 640) men «Astana» (224 651, orta eseppen – 8 640). Eń az jankúıerler Túrikstanda (63 087, orta eseppen – 2 426) tirkeldi.
