Keıde burynǵy men búgingini oısha salystyratyny bar. Sondaıda balaǵa jumystyń qadirin kishkentaıdan uǵyndyryp ósiretin baıaǵylardyń ustanymy eske túse ketetin. Qoradaǵy azyn-aýlaq malyn qarap, esiginiń aldyn aınadaı qylatyn balalar sabaqqa da úlgerip jatýshy edi. Ony bylaı qoıǵanda ózgege de kómek kórsetip, qolǵabys tıgizetin sol oqýshylar bolatyn. Muny kórip óskenderdiń eshqaısysy qara jumystan qashqan emes. Kez kelgen sharýaǵa bilek sybana kirisip ketetin.
Mektepti bitirgen 1989 jyly qurylysshy bolyp shyǵa keldi. Áskerden keıin de kóp oılanbaı osy salaǵa oraldy. Qaladaǵy birqatar ǵımarattyń boı kóterýine úles qosqan sheber tasqalaýshy boldy. Keıin ózine kafel japsyrýdy da senip tapsyratyndar kóbeıdi. Aýlaǵa tóseletin órnektasty ta tep-tegis etip jymdastyra qoıatyn sheberligi bir bólek áńgime. Jumysyn shala istep, beti qyzarǵan kezi joq. Qaıta isine yqtııattyǵy, kásibine adaldyǵy basqalarǵa úlgi boldy. Biraq jasy elýge jaqyndaǵanda burynǵydaı emes, qurylystyń ózine aýyr tıe bastaǵanyn baıqady. Qımasa da qurylysshylyqty qoıýǵa týra keldi. Sol kúni ózin qoıarǵa jer tappaı, bir qyzyq jaǵdaıdy bastan keshti. Bir kún de bos otyryp kórmegen adam mundaıda ózin kereksiz sezinip, qatty qınalatynyna kózi jetti. Kóp uzamaı jumysqa qaıta shyǵyp, «Qyzylorda tazalyǵy» mekemesi jumysshylarynyń qataryn toltyrdy. Oǵan da mine alty jyldan asyp barady.
– Jumys barysynda talaı jaǵdaı boldy. Qarǵa adym jerdegi jáshikke qoqysyn tastaýdy qıynsynatyndardy da kórdik. Aýladan uzamaı, qolyndaǵy qoqys toly paketti laqtyra salatyndardyń kóbi balalar. Eskertip aıtsań, ózińe alaıyp qaraıdy. Osydan-aq úıinde úlkenderdiń oǵan tazalyq, eńbekti baǵalaý jaıly eshteńe aıtpaǵany ańǵarylyp qalady. Olarǵa aqyl aıtady degenderdiń arasynan «bul meniń jumysym emes» degen oıda júrgender barshylyq. Tipti sen esiginiń aldyn aınadaı qylyp tazartyp jatqanda terezeden qyzyqtap turatyndarǵa ne aıtasyń. Osydan da mektep baǵdarlamasyna tazalyqty arnaıy pán retinde kirgizip, balalardy erte bastan soǵan baýlyǵan jón be degen oıǵa kelesiz. Tipti bul istiń mańyzy týraly shaǵyn kórinister túsirip, áleýmettik jeli arqyly taratqan da artyq bolmas edi. Qolyndaǵy alaqandaı telefonnyń aıtqanymen júretin balalar sonda oılanar bálkim, – deıdi B.Qaldybaev.
Tazalyqshynyń jumysy qashan da qarbalas. Qatty sharshasań da jyp-jınaqy bolǵan kóshe kóńil toǵaıtady. Qazir mekemede arnaıy tehnıka qatary kóbeıdi. Qar kúreıtin, shań soryp alatyn túrleri de bar. Biraq adamnyń qol kúshi árdaıym kerek. Mekemedegi jumysshylardyń deni 40-50 jastan asqandar. Aptasyna bir-aq kún demalatyn, qystyń aıazy men jazdyń aptabyna qaramaıtyn tazalyqshynyń tirligi ońaı emes. Tańmen talasa iske kirisip, kesh bata tolas tabatyn tazalyqshy jumysyn aýyrsynǵan jastar jaǵy kóp turaqtaı bermeıdi.
«Taza Qazaqstan» ekoaksııasy salany alǵa bastyrýǵa sep boldy. Bastama júzege asyryla bastaǵaly beri jurttyń qorshaǵan ortaǵa degen kózqarasynyń ózgergeni baıqalady. Senbilikter jıi uıymdastyrylyp, ortaq iske úles qosqandar qatary kóbeıdi. Osynyń arqasynda Qyzylorda qazir elimizdegi eń taza qala atanyp otyr, – deıdi ol.
Keıipkerimizdiń sóziniń jany bar. Qazir oblys ortalyǵy, aýdandar men aýyldarda kósheler keńeıip, jurt demalatyn alańdar kóbeıdi. Bul jańalyqta B.Qaldybaev sekildi kásibine adal júzdegen jannyń úlesi bar.
QYZYLORDA
