Palata spıkeri suhbattasýshyny Keńse basshysy bolyp taǵaıyndalýymen jáne atalǵan qyzmetke resmı túrde kirisýimen quttyqtady. Sondaı-aq ol qaýipsizdik pen yntymaqtastyqqa qatysty mańyzdy máseleler boıynsha sheshim qabyldaýda Uıym Shyǵys pen Batys arasyn baılanystyratyn «kópir» retinde úlken áleýetke ıe ekenine nazar aýdardy. Senat tóraǵasy Qazaqstan EQYU-men jáne onyń ınstıtýttarymen nátıjeli seriktestikti árdaıym joǵary baǵalaıtynyn da atap ótti.
«Qazaqstan Parlamentiniń depýtattary EQYU Parlamenttik Assambleıasynyń sessııalaryna, onyń komıtetteriniń jumysyna jáne baıqaý mıssııalaryna belsendi qatysyp keledi. Biz EQYU-nyń Astanadaǵy Baǵdarlamalar keńsesimen de nátıjeli jumys isteımiz. Bizdiń seriktestigimiz Astana deklarasııasynda bekitilgen qaýipsiz qoǵamdastyq qurýdy kózdeıtin ortaq ustanymǵa taban tireıdi», dep M.Áshimbaev Qazaqstan EQYU-men barlyq baǵytta ózara yntymaqtastyqty ári qaraı damytýǵa múddeli ekenin tilge tıek etti.
Sonymen qatar Senat tóraǵasy Memleket basshysynyń bastamasymen elimizde júrgizilip jatqan reformalardyń iske asyrylý barysyna toqtaldy. M.Áshimbaev atap ótkendeı, ózgerister Ádiletti Qazaqstan tujyrymdamasyn júzege asyrýǵa arnalǵan. Kezdesýde palatanyń zań ústemdigin qamtamasyz etý, azamattardyń quqyqtaryn qorǵaý, ınklıýzııa, demokratııalandyrý jáne Ornyqty damý maqsattaryna qol jetkizý salalaryn qamtıtyn zańnamalyq qyzmetine de basa mán berildi.
Suhbat barysynda taraptar parlamentaralyq baılanystardy keńeıtýdiń basym baǵyttaryn belgilep, birlesken jobalardy iske asyrý jóninde pikir almasty.
О́z kezeginde A.Rogov Qazaqstan men EQYU yntymaqtastyǵyn odan ári nyǵaıtýǵa múddeli jáne josparlanǵan jobalardy birlesip iske asyrýǵa daıyn ekenin jetkizdi. Taraptar Qazaqstan Parlamenti men EQYU Baǵdarlamalar keńsesiniń ózara is-qımyl nátıjelerin de talqylady. Sondaı-aq Keńse basshysy transshekaralyq syn-qaterlerge qarsy kúres, qorshaǵan ortany qorǵaý, adamı ólshemderdi kúsheıtý jáne Ornyqty damý maqsattarynyń kún tártibi salasyndaǵy yntymaqtastyqty odan ári nyǵaıtý máseleleri týraly aıtty.
