О́ner súıer qaýymnyń nazaryna kásibı qylqalam sheberleri Málik Qaıdarov, Qurmanǵazy Aqashev, Ernat Imanbakıev, Nurbolat Talǵatuly, Aıdos Seıdaqul, Málik Jumaǵulov, Baqtııar Búrkitbaev, Tólegen Súleımenov, Serik Taınov, Nurlan Sataev, Serik Aǵataev, Aqmaral Qajybek, Perızat Taınova, Turǵyn Abdýrahman jáne basqa da sýretshilerdiń 30-ǵa jýyq jumysy usynyldy.
Maıly boıaýmen salynǵan týyndylarda Ál-Farabı atyndaǵy QazUÝ-dyń jyldyń tórt mezgilindegi kórinisi beınelengen. Ýnıversıtettiń sáýlettik kelbetimen qatar, onyń rýhanı ortalyqtary men oqý ǵımarattary qamtylǵan.
Kórme jumysymen tanysqan QazUÝ rektory Janseıit Túımebaev sýretshilerdiń týyndylaryn joǵary baǵalap, mundaı mádenı jobalardyń jastar arasynda ulttyq qundylyqtar men beıneleý ónerin dáripteýge jol ashatynyn atap ótti. Sonymen qatar ýnıversıtet qalashyǵynda qys-kóktem aılarynda da plener uıymdastyrý qajettigin aıtty.
«Plenerge qatysýshy sýretshiler QazUÝ-dyń kórinisin joǵary deńgeıde beınelegen. Bul týyndylar oqý ordasyndaǵy 16 fakýltetke jáne kitaphanaǵa qoıylyp, kóshpeli kórme jumysy uıymdastyrylady. Sondaı-aq aldaǵy ýaqytta QazUÝ bazasynda qolóner, sýret ortalyǵyn ashý mańyzdy», dedi rektor.
Jasandy ıntellekt tehnologııalaryn shyǵarmashylyq salada qoldanýdy nasıhattaý, stýdentterdiń sıfrlyq oılaý, vızýaldy ekspressııa qabiletterin damytý, sondaı-aq jastardyń ınnovasııalyq áleýetin arttyrýdy maqsat etken kórmede zamanaýı tehnologııa men dástúrli óner úılesim tapqandaı.
Jasandy ıntellekt dáýirindegi QazUÝ-dyń damýy men bolashaqtaǵy kelbetin qylqalam arqyly beıneleý, sondaı-aq jasandy ıntellekt kómegimen sýret salý konkýrsyn uıymdastyrý stýdentterdiń qyzyǵýshylyǵyn arttyra tústi.
ALMATY
