Joǵary bilim alǵan soń týǵan aýylyna týyn tigip, óksheleı ósip kele jatqan urpaqqa tálimdi tárbıe, tereń bilim berýdi ózine maqsat etken Nurbek Kerimbaıuly alǵashqy kúnnen-aq irkilissiz izdenispen eńbek etedi. Qarasózdiń qaımaǵyn qalqı sóıleıtin sheshendigi men iskerligi oqýshylardyń bilimge degen yntasyn oıatyp qana qoımaı, olardyń ádebıetke qyzyǵýshylyǵyn arttyryp, sabaq úlgerimderiniń jaqsara túsýine oń áserin beredi. Bilikti pedagog ýaqyt kóshinen qalmaı, oqytýdyń tyń ádis-tásilderin qoldana otyryp, shákirtterin jetistikke jeteleıdi. Nátıjesinde, qazaq tili men qazaq ádebıetine qyzyǵýshylyǵy basym mektep oqýshylary mektepishilikten bastap, aýdandyq, oblystyq, tipti respýblıkalyq baıqaýlardyń jeńimpazdary atanyp keledi.
«Bul meniń ǵana emes, jalpy ujymnyń, oqýshylarymnyń jetistigi dep bilemin. «Jaqsy muǵalim – mekteptiń júregi» dep Alash arysy Ahmet Baıtursynuly aıtqandaı, muǵalim ózine júktelgen jaýapkershilikti jete sezinip, erinbeı eńbektense asqar taýdaı bıikterdi baǵyndyrýǵa bolady. Mysaly, balanyń kitap oqýǵa qulshynysyn oıatýdyń túrli tásilderin paıdalanamyn. Men úshin kitap – balalarǵa daıyn aqparat emes, qııal álemine ashylǵan portal. Oqýshylardy qyzyqtyrý úshin biz keıde ár oqyǵan kitaptan komıks jasaımyz. Keıipkerlerdiń beınesin olar óz qııalymen salady, sıýjet jelisin qysqa dıalogke aınaldyrady. Biri sýret salady, biri sóz jazady, biri boıaıdy – bári ortaq eńbekke qatysady. Osylaısha, kitap qaǵazda ǵana emes, olardyń kóz aldynda «tiri» dúnıe bolyp shyǵady. Iаǵnı oqýshylarǵa kitapty mindet emes, oıyn, shyǵarmashylyq alańy retinde kórsetý áldeqaıda tıimdi», deıdi ushqyr oıly ustaz.
Bul syndarly sátke deıin de birneshe satydan súrinbeı ótken Nurbek Kerimbaıuly «Jyldyń úzdik muǵalimi – 2025» baıqaýyna joldama alǵannan bastap ustazdyq joldyń daralyǵyn, danalyǵyn, parasattylyǵyn, shyǵarmashylyǵyn, jaýapkershiligin kórsetýge bar kúsh-jigerin jumyldyrǵan. Nátıjesinde, tynymsyz eńbegi aqtalyp, baıqaýdyń bas júldesin qanjyǵasyna baılady.
Jas maman kezinen-aq ashyq sabaqtaryn aýdandyq, oblystyq kólemde ótkizip, tájirıbesin taratqan daryndy pedagog buǵan deıin de talaı belesterdi baǵyndyrǵan. Atap aıtsaq, oblystyq «Úzdik til mamany», Beısen Quranbek atyndaǵy jalpy bilim berý uıymdary pedagogteri arasyndaǵy Olımpıadanyń júldegeri, «Sóz sheberi» baıqaýy, «Esse» baıqaýlarynyń jeńimpazy atanǵan.
Tájirıbesi 15 jyldan asqan pedagog zertteýshi Nurbektiń basty qaǵıdasy – bulaq kórse, kózin ashý. Osy maqsatta talantty shákirtter daıarlaýdan tanbaǵan. Sonyń biri, mektep maqtanyshy Sálim Baıan bıyl 11-synypty támamdaıdy. Ol da ustazynan úlgi alyp, Qadyr Myrza Áli, Muqaǵalı oqýlarynda jeńimpazdar qatarynan kóringen.
Almaty oblysy
