Fotolar: Oqý-aǵartý mınıstrligi
Ásirese, bilim sapasyn arttyrý, shaǵyn jınaqty mektepterde oqý prosesin uıymdastyrý, balalardyń qaýipsizdigin qamtamasyz etý, «Zań men tártip» qaǵıdaty aıasynda quqyqtyq tárbıe berý, ata-analardyń mekteppen yntymaqtastyǵy, bilim berý júıesiniń qyzmetkerleriniń kásibı biliktiligi máselelerine erekshe nazar aýdaryldy.
Mınıstr óz jumysyn Jambyl, Baızaq aýdandaryndaǵy Toǵyztaraý, Shoqaı, Sarykemer aýyldarynda ornalasqan bilim berý uıymdarynan bastady. Bilim berý júıesin jetildirý, bilim sapasyn arttyrý, oqý prosesin tıimdi uıymdastyrýǵa basymdyq bergen J.Súleımenova ár mektepte pedagogıkalyq ujymdarmen kezdesip, sabaqtarǵa qatysty, oqýshylarmen sabaq úlgerimderi, bilim men ǵylymǵa qyzyǵýshylyqtary týraly suqbattasty.
«Elimizde Memleket basshysynyń qoldaýymen pedagogter men bilim alýshylar úshin jaıly ári sapaly bilim berý ortasyn qurý baǵytynda keshendi jumystar júrgizilip jatyr. Jastardyń bilim men ǵylymǵa qushtar, eńbekqor jáne ulttyń rýhanı murasyn saqtaıtyn, álemdik bilim básekesine qabiletti Adal azamat bolyp qalyptasýyna bilim berý júıesiniń árbir qyzmetkeri jaýapty. Bizdiń mindet – aýylda da, qalada da birdeı mektep ınfraqurylymyn qura otyryp, balalar úshin bilimniń joǵary sapasy men ozyq bilim tehnologııalaryn qoljetimdi etý», dedi Juldyz Súleımenova.
Sapar aıasynda mınıstr eń aldymen Toǵyztaraý aýylyndaǵy T.Toqtarov atyndaǵy orta mektepke bardy. Munda 100-ge jýyq oqýshy bilim alady, kórshi aýyldardan qatynap oqıtyn balalar da bar. Bul osy aımaqtaǵy shaǵyn jınaqty mektepterdiń biri. Jambyl oblysynda 149 shaǵyn jınaqty mektep bar.
Kelesi bilim berý nysany – Shoqaı aýylyndaǵy eki jyl buryn qoldanysqa berilgen zamanaýı №3 mektepte 187 bala oqıdy. Mektep zamanaýı lıngafondyq, robototehnıka, eńbekke baýlý synyptarymen jabdyqtalǵan. Al aýdandyq О́ner mektebinde balalar shyǵarmashylyq, tehnıkalyq jáne ǵylymı baǵytta túrli robototehnıka, bıotehnologııa, 3D modeldeý, beıneleý óneri jáne mýzyka úıirmelerinde qosymsha bilim alyp júr.
Mınıstr Sarykemer aýylynda ótken jyly qoldanysqa berilgen 600 oryndyq «Keleshek mektebinde» boldy. Shaǵyn aýyldaǵy zamanaýı mektepte balalar úshin naqty ǵylym salasyndaǵy 3 zerthana, erte jastan eńbekke beıimdeıtin 2 sheberhana, sondaı-aq, kompıýterlik kabınet pen kovorkıng aımaqtary, oqý zaldary qoljetimdi.
Sondaı-aq Juldyz Súleımenova Taraz qalasyndaǵy Oqýshylar saraıyn aralady. Munda balalarǵa qosymsha bilim berý baǵytynda 85 shyǵarmashylyq, zııatkerlik, ǵylymı-tehnıkalyq, sporttyq úıirmeler jumys jasaıdy. Bir kúnde 2500 balaǵa deıin ortalyqta dáristermen, jattyǵýlarmen qamtylady.
Jambyl oblysyna jumys sapary barysynda mınıstr balalardyń quqyqtaryn qorǵaý men olardyń qaýipsizdigin qamtamasyz etý máselelerine arnalǵan úılestirý keńesiniń otyrysyna qatysty.
