Jıynǵa qatysýshylarǵa mańyzdy bas qosýdyń maqsaty týraly tanystyrǵan Mádenıet jáne aqparat mınıstrligi Arhıv, qujattama jáne kitap isi komıtetiniń tóraǵasy Rýstam Alı vedomestva basshysy Aıda Balaevanyń quttyqtaý hatyn oqydy.
«Sizder elimizdiń tarıhı-mádenı murasy men baǵa jetpes jádigerlerin saqtaý, olardy ǵylymı aınalymǵa engizý, keleshek urpaqqa jetkizý jolynda qajyrly qyzmet etip kelesizder. Eldiń zııatkerlik menshigi men mádenı ıgiliginiń tutastyǵyn saqtap, arhıv isin jetildirip, aýqymdy jobalardy júzege asyrǵandaryńyz úshin alǵysym sheksiz», depti mınıstr óz quttyqtaýynda.
Is-shara barysynda qatysýshylarǵa «Arhıv – 2025» baǵdarlamasy boıynsha atqarylǵan jumystar men qol jetkizilgen nátıjeler talqylanyp, beınerolıkter men kórme materıaldary usynyldy. Sonymen qatar arhıv mekemeleriniń materıaldyq-tehnıkalyq bazasyn jańǵyrtý, sıfrlyq júıege engizý baǵytynda atqarylǵan jumystar tanystyryldy.
Atap aıtar bolsaq, bes jylǵa josparlanǵan baǵdarlama aıasynda Germanııa, Polsha, Chehııa, Túrkııa, Fransııa, Vengrııa, Úndistan, Iran, Egıpet, Qyrǵyzstan, Reseı, Ázerbaıjan, Belarýs, Katar respýblıkalaryna ǵylymı-ekspedısııalar jiberilip, nátıjesinde 913-1990 jyldar aralyǵyna tán, Qazaqstan tarıhyna qatysty 7 000-nan asa qundy qujattar jınaqtalyp, ǵylymı aınalymǵa engizildi.
Bulardyń ishinde: 918 jyly Temir hannyń Saıbek hanǵa elshi jiberip Buryndyqpen mámilege kelýi týraly derekter jáne Shyǵys Túrkistan halqynyń táýelsizdigimen bostandyǵy úshin kúresken Ospan batyr týraly Nurǵojaı batyrdyń estelikteri qatarly mańyzdy qujattar bolsa, kelesi kezekte reseılik arhıv qorlarynan alynǵan qazaqtyń kúıshi qyzy Dına Nurpeıisova men bıshi Shara Jıenqulova qatysqan qysqa beınesıýjettik muralar arhıv qoryna endi.
Orta Azııa jáne Turan kartasy. 1832 jyl. Chehııa ulttyq kitaphana qorynan alyndy.
Altyn Orda bıleýshisi Áz Jánibek hanǵa arnalǵan qoljazba. 1350-1351 jj. Tuhbet ál-Haqan
